مهم 👀

أهلا الظاهرة رونالدو جماعة نا انسان منتفرجش مرة القدم بزاف ، و لكن بزاف ناس كي يشوفوك متبع كريستيانو رونالدو ومبهور بيه يسقسوك باستهزاء علاه راك تحب هاذ البنادم وتتبع فيه ، يقولولك سيد راه يربح الملاير وداير حالة في حياتو ونتا واش راك مستفاد منو ، هاد النظرة السطحية هي لي خلات الأغلبية تاع الناس فاشلين لاخاطر يشوفو غير هكاك فقط ، الفرق بين رونالدو وبين أي لعاب واحد آخر في العالم هو أن رونالدو ماشي مجرد لعاب كورة ، رونالدو عبارة عن عقلية وحالة نفسية وبنادم تقدر تدرسو وتحللو كظاهرة ، لأنو هو بحد ذاته يدرسو عليه فالجامعات العليا الأمريكية و ما شابهها ! علاه رونالدو بالضبط وماشي لعاب آخر ، لاخاطر المجتمع البشري بطبعو يحب يقدس الموهبة الفطرية باه يلقى مبرر للفشل والكسل تاعو ، كي تشوف إنسان موهوب بالفطرة عقلك الباطن يرتاح ويقولك هاذا ربي عطاه ومحال نكون كيفو وتكمل ترقد ، بصح رونالدو يكسرلك هاذاك الوهم ، رونالدو هو تجسيد حي لانتصار الانضباط والخدمة العمياء على الموهبة ، هو بنادم بدا من الزيرو وطلع من الأعماق تاع الميزيرية وما لقى حتى واحد وقف معاه ولا عاونو باش يوصل ، هاذاك الصعود الصعب تاعو ضد ڨاع التوقعات يخليك تحس بالخجل من روحك ومن الأعذار لي راك تخلق فيها كل يوم باش تبرر الركود تاعك ملخر تحب أو تكره واش نستفادو منو فلسفيا ونفسيا ؟ الاستفادة ماشي في التيتراج ولا في شحال من بيت ماركاه ، الأمر كامل راه في هاذيك الطاقة لي ينقلهالك كي تتأمل في المسيرة تاعو ، رونالدو ينقلك هاديك القوة وهاذاك الانضباط الحديدي لي يخليك تآمن بلي تقدر تنجح وتوصل مهما كانت الظروف لي راك محاصر بيها ومهما كانت البلاصة لي خرجت منها ، هو مدرسة متنقلة وعبارة عن خريطة طريق تقدر ترفدها وتطبقها وتديها كمثال في أي مجال في حياتك ، سوا كنت تقرا ولا تخدم ولا تبني في مشروعك الخاص نا ما نتبعوش رونالدو لاخاطر يعرف يلعب ، نا نتبعو لاخاطرو يمثل أعظم مثال تاع نجاح وصعود في التاريخ الحديث ، هو المرجع لي نديوه كقدوة باه نفكروا رواحنا بلي البنادم لي ما عندو والو يقدر يوصل لكلش إذا حط راسو ورفض يستسلم ، نهار تتبنى العقلية تاع هاذ وتزرعها في مخك ، حياتك راح تتبدل كليا لاخاطر هاذ العقلية راح تعاونك بزاف وتقتل فيك متلازمة الضحية وتردك إنسان يخدم في بعقلو ويتحمل مسؤولية الفشل والنجاح تاعو بلا ما يبكي على الزهر والمكتوب و العقلية تاع راهم يضربو فيا بالعين ههه بكل إختصار ، تشوف حياتو من لي كان صغير و فقير لحتى دك باه تقدر تفهمني ، امبوسيبل تقتنع وحدك بهذا المنشور ، مي كي تطالع كيفاه جوز حياتو راح تفهموني 💯 دمتم