https://taubinpoetry.com/killed-be/zakharevich-niaudziachny-syn/

Тымчасам на партале TAUBIN выйшла падборка маіх перакладаў польскамоўнай паэзіі міжваеннай Беларусі (удакладнім - Усходняй Беларусі, тагачаснай БССР). Літаратура ў нас заўсёды была шматмоўная і шматнацыянальная, але тады - асабліва (чатыры дзяржаўныя мовы!). І многіх аўтараў чакаў трагічны лёс... Або невядомы. Вось і Арнольд Захарэвіч, творы якога я ўпадабаў найбольш (было з чаго выбраць...) у 1930-х зьнік невядома куды. А вершы пісаў даволі гарэзьлівыя. Ніколі не заліваў у канал сваіх перакладаў, але няхай ужо адзін будзе. Арнольд Захарэвіч ЖАРТЫ ВЕТРУ Рудая восень-панна Ягнят стрыжэ старанна – Зьдзірае лісьце з дрэваў. А вецер цягне спевы, Захоплены дашчэнту, Ёй сыпле камплімэнты. Наўзамен ён воўну просіць Зь лісьця чэзлага кавалкаў І фальшыва так галосіць, Нібы йдзе за катафалкам — Жалобна вые вецер Ля воза са сьмецьцем. Як дзед буркатлівы, Скупляе тавар мітусьліва, Гандлюецца з парай бярэзін, Да ліпы разлапістай лезе, Плáціць за тавар таварам, За хлам падкіне грушак пару. "Голкі, галінкі, — з хвоі, ялінкі!" — Ён крычыць гугнява Налева і направа. Зьбег у пустыню, сеў на вярблюда, З пальмамі шэпчацца ўвішны прыблуда, Едзе далей зь песьняю п’янай, Доўгія дні ад рана да рана Шукае начлег, зьяжджае з дарогі Заблуканы, гнеўны і строгі, Скакуна двухгорбага шпорыць, Падганяе да бегу і чморыць, А той на месцы круціцца тупа, Ажно прабіў зямную шкарупу. З глебы паўсталі, бы ў лесе зладзеі, Віры высачэзнай пясчанай завеі. Вецер як вол ад сьляпня ўцякае, Ажно сыпучы дол выбухае! Вось уцячэ ад пагоні — Сядзе ў карчме на ўтульным услоне. Натоліцца хмелем восеньскай слоты І пойдзе платы запускаць у палёты, І высьвішча гэты свой стан блазнаваты Ў прыпеўках вулічнага вар’ята. [1929]

⭐️ Школа маладога пісьменніка - новы сезон Адкрыты новы набор на нефармальны адукацыйны праект - "Школу маладога пісьменніка", што працуе з 2012 году. Сёлетнія выкладчыкі - Ульяна Верына, Віктар Жыбуль, Марына Казлоўская і Андрэй Хадановіч. 🔥🔥🔥 Навучанне - з лістапада 2026 да чэрвеня 2027 году. Заняткі - чатыры разы на месяц, па суботах. Навучанне — бясплатнае, дыстанцыйнае (online). 👍👍👍 Для ўдзелу пакіньце заяўку, якая павіннa ўключаць: 1) уласны мастацкі твор любога жанру, альбо фрагмент твора, на беларускай альбо рускай мове аб’ёмам 3—10 ст.; 2) матывацыйны ліст: “Чаму я хачу паступіць у Школу маладога пісьменніка?”; 3) спіс з 5—10 кніг, якія паўплывалі на вас як на творцу. ❗️Дэдлайн прыёму заявак блізка, — 5 лістапада 2026 году, спяшайцеся! 👉 Адрас для заявак bellit.info@gmail.com #навіны