Телеграм канал «Uzbekistan Embassy in Israel 🇺🇿🇮🇱»

🇺🇿 Xorijdagi O‘zbekiston fuqarolari uchun konsullik xizmatlari mobil ilovasi ishga tushirildi

Chet elda yashayotgan yoki xorijiy safarlarni rejalashtirayotgan O‘zbekiston Respublikasi fuqarolari diqqatiga!
Konsullik masalalarini tezkor va masofadan hal etish uchun qulaylik yaratish, shuningdek, barcha zarur ma’lumotlarni bevosita mobil qurilma orqali taqdim etish maqsadida rasmiy mobil ilova ishlab chiqildi va ishga tushirildi.

Zamonaviy raqamli yechimlarni o‘zida mujassam etgan mazkur ilova quyidagi asosiy funksiyalar va imkoniyatlarni taqdim etadi:
📍 Diplomatik vakolatxonalarning geolokatsiyasi va aloqa ma’lumotlari:
Yagona bazada O‘zbekiston Respublikasining xorijdagi barcha elchixonalari va konsullik muassasalarining aniq manzillari, geolokatsiyasi — xaritadagi joylashuvi hamda to‘liq aloqa ma’lumotlari jamlangan. Bundan tashqari, ilovada “konsullik okruglari”ni tekshirish funksiyasi joriy etilgan bo‘lib, uning yordamida fuqarolar o‘zlari turgan mamlakat yoki hudud qaysi xorijdagi muassasa vakolatiga kirishini tezda aniqlashlari mumkin.

📄 Masofaviy konsullik xizmatlari:
Hozirgi vaqtda ilova orqali fuqarolar quyidagi konsullik xizmatlarini olish uchun masofadan ariza topshirishlari mumkin:
— Vatanga qaytish guvohnomasini rasmiylashtirish;
— Vaqtinchalik va doimiy konsullik ro‘yxatiga turish.
(Izoh: Kelgusida mavjud konsullik xizmatlari ro‘yxati bosqichma-bosqich kengaytirib boriladi.)

⚡️ Anketalarni avtomatik to‘ldirish tizimi:
Konsullik xizmatlaridan foydalanish jarayonini soddalashtirish maqsadida yangi texnik imkoniyat joriy etildi. Tizim ariza va anketalardagi asosiy majburiy maydonlarning qariyb 80 foizini avtomatik tarzda to‘ldirish imkonini beradi, bu esa murojaat yuborish jarayonida fuqarolarning vaqtini sezilarli darajada tejaydi.

✈️ Viza talablari bo‘yicha ma’lumotnoma — test rejimida:
Ilovada O‘zbekiston fuqarolari uchun xorijiy davlatlarga kirish vizalari talablari haqidagi dolzarb ma’lumotlarni o‘z ichiga olgan maxsus axborot bo‘limi yaratildi. Hozirgi kunda ushbu bo‘lim test rejimida faoliyat yuritmoqda, ma’lumotlar bazasi esa muntazam ravishda to‘ldirilib va yangilanib borilmoqda.

Ilova bepul taqdim etiladi. Uni quyidagi rasmiy havolalar orqali yuklab olish mumkin:
🤖 Google Play (Android): https://play.google.com/store/apps/details?id=consular_services_uzb.org&hl=ru
🍏 App Store (iOS): https://apps.apple.com/us/developer/mfa-uz/id1818537775
Xorijda vaqtingizni tejang hamda zamonaviy raqamli texnologiyalar yordamida konsullik xizmatlaridan xavfsiz va qulay foydalaning.

📱Telegram - 👈🏻Обуна бўлиш.
📷Instagram🌐Web

📢 Ҳурматли Исроил Давлатидаги Ўзбекистон Республикаси фуқаролари!

Исроилдаги хавфсизлик вазияти кескинлашиши мумкинлиги муносабати билан, эҳтиёткорликни кучайтиришингизни сўраймиз.

Шу муносабат билан, Элчихона барча Ўзбекистон фуқароларини Исроил Фронт орти қўмонданлиги кўрсатмаларига қатъий риоя қилишга чақиради.

Хавфсизлик мақсадида:

- Доимо ҳимояланган жойларга яқин ҳудудда бўлинг.
- Ҳаво ҳужуми ҳақида сигнал берилганда ёки сирена эшитилганда дарҳол ҳимояланган жойга киринг.
- Фронт орти қўмондонлиги томонидан расмий рухсат берилмагунча ҳимояланган жойни тарк этманг.
- Расмий хабарлар ва фавқулодда кўрсатмаларни доимий равишда кузатиб боринг.

Эслатиб ўтамиз, шошилинч мурожаатлар учун қуйидаги алоқа воситалари фаолият юритмоқда:
📞 03-672-2466 / 03-672-2371 / 03-758-5075 / 03-758-5076
📞 Фавқулодда ва шошилинч хабарлар учун: +972 54-4851397
📧 Электрон манзил: il.uzembassy@mfa.uz

🇺🇿 Ўзбекистон Республикасининг Исроил Давлатидаги Элчихонаси