و انت بتاخد كورتيزون لازم تاخد بالك من الاتى:-- اولا تتاخد بعد الفطار و يفضل ناخد علاج للمعدة طوال فترة استخدامها... ثانيا ناخد كالسيوم و فيتامين دال فترة العلاج بالكورتيزون ثالثا نتابع الضغط و السكر بانتظام رابعا متابعة نسبة البوتاسيوم بالدم خامسا و ده الاهم ما تاخدش الكورتيزون من نفسك و لو مشيت عليه فترة اكثر من عشر ايام او اسبوعين اوعى توقفه فجأة لانه لازم ينسحب تدريجيا د. محمد عبدالرازق

هل الزعل ممكن فعلا يسبب جلطة تؤدي إلي الوفاة؟؟؟ _هوا أنت هتوديني لمركز قلب ليه ي دكتور دلوقتي؟؟ وليه استعجلت أخويا كده إنه يروح يجيب عربية؟ =متقلقش ده أنا بس باعتك لدكتور قلب يديك برشامتين وإن شاءالله الألم اللي ف صدرك ده يروح خالص. ده كان شاب جميل -ربنا يرحمه- عنده 32 سنة جالي هوا وأخوه المستوصف الشاب كان جي بيقول "حاسس بألم ف صدري ي دكتور وتنميل فظيع ف دراعي الشمال بقالي أسبوع كده بس النهاردة أنا حاسس روحي بتتسحب مني ي دكتور ومعايا مشاكل كبيرة جدًا في شغلي فقولت شوية زعل وهيروحوا لحالهم إنما الألم كل يوم بيزيد عن اللي قبله" اترعبت من شكوته بس كنت متماسك جدًا قدامه وقومت قستله الضغط وعملتله رسم قلب وهنا كانت الصدمة.......... BP 170/95 Inferior myocardial infarction (احتشاء عضلة القلب) خلينا نقولها بالعامية.... المريض عنده جلطة ع القلب ومحتاج قسطرة قلبية ودعامة فورًا فورًا أول ما شفت رسم القلب لودته وقولتله احنا هنروح المستشفي دلوقتي وأخدت أخوه برا فهمته إنه جلطة ومينفعش يستني ولازم ينزل يجيب عربية ويوديه المستشفي فورا. للأسف متلحقش ف المستشفي ربنا يرحمه ولكن لحد دلوقتي مازال سؤاله بيدور جوا وداني وهوا بيضحك وبيقولي دكتور قلب ليه ي دكتور أنا كويس ده أنا حتي صغير.... وأنا قاعد اضحك معاه وأطمنه برغم جوايا مرعوب يقع ف أي لحظة... ومازال كلام أخوه مع زوجة الشاب ده وهوا بيطمنها وبيقولها متقلقيش الدكتور بيعمله رسم قلب وهنروح أهو.... ده شاب أنا عيطت عليه كتير جدًا ولحد دلوقتي بقول وكأني بعاتبه مقدرتش تيجي قبلها بساعة!!! ساعة واحدة بس!!! طيب نص ساعة طيب!!! ولكن بلحق نفسي وارد علي نفسي وبقول إن ده قضاء ربنا وإن دي أعمار ربنا كاتبها. د. أحمد رأفت