إذا فلان زعلان من فلان.. لا تزعل على نفس الفلان وتقاطعة، يعني لا تشيل الليلة كلها، وطالما الشخص ما سوالك شي مو زين، ميصير تقاطعه لخاطر صاحبك اللي مقاطعه، الأيام راح تفتر والاثنين راح يتصالحون وساعتها إنت اللي راح تطلع مو زين وراح تكون زوج.. عامل الناس باللي تشوفه منهم مو باللي تسمعه عنهم.

النقاش وي الشخصيات اللي ما تغلط نفسها مُتعب والتعامل وي النوع هذا من الناس يگصر العمر، لإنهم ببساطة ما يشوفون غير نفسهم، ولازم يطلعون دائمًا هم الصح، وعتابك الهم ما بيه فايدة غير إنه يتعبك أكثر ويضغط عليك لدرجة تخليك تبطل تعاتبهم لإن تعرف النتيجة .. راح يطلعونك إنت الغلطان ويهاجمونك بشراسة، هذا النوع من الناس هجره أسلم حل الك ولصحتك .. لإن مهما صار ما راح يعترفون بغلطهم.

منو گال إذا اريد اخذ حقي لازم أسوي بيك نفس اللي إنت سويته بيه؟ أنا ممكن أَخذ حقي منك بدون ما أقلل من قيمتي ولا حتى اسوي تصرفات تصغرني بنظر نفسي، مثلًا ممكن أگول (حسبي الله ونعم الوكيل) وأستعوض الله وأنتظره يجيب حقي منك، شنو رأيك؟ شفت الموضوع سهل شلون، بس ياريت إنت وقتها تگدر تتحمل عواقب دعاء المظلوم (وَمَا كَانَ رَبُّكَ نَسِيًّا).