Davlat organlari va tashkilotlari xodimlari uchun xavfsiz va hurmatga asoslangan ish muhitini ta’minlash bo‘yicha treninglar bo`lib o`tmoqda. Bugungi kunda davlat boshqaruvi tizimida samaradorlikka erishish, avvalo, tashkilot va muassasalarda sog‘lom ma’naviy-ruhiy muhitni shakllantirish, xodimlarning sha’ni, qadr-qimmati, huquq va qonuniy manfaatlarini ta’minlash bilan chambarchas bog‘liq. Ayniqsa, mehnat jamoalarida o‘zaro hurmat, tenglik va hamjihatlik tamoyillarini mustahkamlash, tazyiq hamda zo‘ravonlikning har qanday ko‘rinishlariga murosasiz munosabatni shakllantirish dolzarb ahamiyat kasb etmoqda. Shu maqsadda Olot tumanida davlat organlari va tashkilotlari xodimlari ishtirokida “Davlat mehnat sohasida xavfsiz va hurmatga asoslangan ish muhitini ta’minlash hamda tazyiq va zo‘ravonlikning oldini olish” mavzusida o‘quv-treninglar bo`lib o`tmoqda. Treninglar davomida ishtirokchilarga mehnat munosabatlarida xavfsiz va sog‘lom muhitni yaratish, xodimlarning huquqlarini himoya qilish, ish joylarida tazyiq va zo‘ravonlik holatlarining oldini olish, bunday vaziyatlarga duch kelganda to‘g‘ri munosabat bildirish hamda murojaat qilish mexanizmlari yuzasidan zarur bilim va tushunchalar berib borilmoqda. Shuningdek, mashg‘ulotlarda xizmat faoliyati davomida kasbiy etika qoidalariga rioya qilish, rahbar va xodimlar o‘rtasidagi munosabatlarda o‘zaro hurmat tamoyillarini mustahkamlash, kamsitish va tazyiqning oldini olish, jamoada psixologik jihatdan qulay muhitni shakllantirish masalalariga alohida e’tibor qaratilmoqda. Amaliy mashg‘ulotlar va hayotiy vaziyatlar tahlili orqali ishtirokchilarning mavzu yuzasidan bilim hamda ko‘nikmalarini mustahkamlash ko‘zda tutilgan. Mazkur o‘quv-treninglar O‘zbekiston Respublikasi Prezidenti Administratsiyasi huzuridagi Davlat xizmatida inson kapitalini rivojlantirish loyihalar ofisi muvofiqlashtiruvida, O‘zbekiston Respublikasi Prezidenti huzuridagi Boshqaruv samaradorligi agentligi, BMT Aholishunoslik jamg‘armasi (UNFPA), Buyuk Britaniya hukumati va Osiyo taraqqiyot banki ko‘magida, Qoraqalpog‘iston Respublikasi Jo‘qorg‘i Kengesi hamda viloyat hokimliklari bilan hamkorlikda tashkil etilmoqda. Ta’kidlash joizki, bunday o‘quv mashg‘ulotlari nafaqat xodimlarning huquqiy savodxonligini oshirish, balki davlat idoralarida inson qadrini ulug‘lash, o‘zaro ishonch va hurmatga asoslangan mehnat munosabatlarini qaror toptirishda muhim o`rin tutadi. https://t.me/olottumani