▪️▪️▪️▪️▪️ ويلي عالزهره المظلومه ▪️▪️▪️▪️▪️ الف ويل اعله لوعة فاطمه الزهره عالعاشت عمرها اثمنطعش حسره الحمره اعيونها من شدّة السطره العمرها ختمته بضلوع متكسره ▪️▪️▪️▪️▪️ وديعه من ابوها او گال وقروها من غمّض اعيونه شلون جازوها باب اللي يدگها اصحابه حرگوها مشتعله او عله الزهراء طبگوها ▪️▪️▪️▪️▪️ عصروها او هوت عالگاع تتلوّه تتدوّر ما لِگت غير الارض تچوه مره طاحت ابوادم مالها امروّه وگع ميّت ابنها الروسهم يسوه ▪️▪️▪️▪️▪️ من الهجمه خلّوها جلد واعظام او تضعف اكثر اشما مرّت الايّام كل نسمة هوه ابريّتها چنها اسهام او گلبها آلام جارع ما مثلها آلام ▪️▪️▪️▪️▪️ لون ما بالصبُر حامي الحمه اموصّه العصرها ابذو الفِقاره منحره ايگصّه سكوت المُرتضى الهم صُبح فُرصه او جابوا للطهُر چم فاجعه او غُصّه ▪️▪️▪️▪️▪️ يرد الثار باچر بيده راعي الثار الفاطم ينتقم واعيونه تجدح نار يحرگها العصابه الهاجمه عالدار او يذبحهم سوه نسل الكفُر والعار ▪️▪️▪️▪️▪️ ابو الحسن الوائلي

▪️▪️▪️▪️▪️ بداية الويل ابضلع المنكسُر ابواب الآلام فِتح باب الطهُر ▪️▪️▪️▪️▪️ باب ام حسن صار باب الكل جرِح من عدها الاحزان تبدي او تنفتِح طبرة علي الحِيد والسَم والذبِح كلهِن يصبّن ابجرِح زينب ملِح ويّاهن اتعيش بالهَم والصبُر ابواب الآلام فِتح باب الطهُر ▪️▪️▪️▪️▪️ باب ام الْحسين ناره اموجّره والشاهد ام عون گلبها عالجره طفله تصد موت امها الطاهره واتشوفه مطبور ابوها حيدره والدها ينشال تشوفه للگبُر ابواب الآلام فِتح باب الطهُر ▪️▪️▪️▪️▪️ امن العصره لمصاب حمّاي الحمه چبْد الحسن حيف جعده اتسمّمه او زينب لاخوها ابجرحها اتكلّمه السَم خويه خطّار ابچبدك تكرِمه اصواب الحسن ذاك صوّبها غدر ابواب الآلام فِتح باب الطهُر ▪️▪️▪️▪️▪️ من عملة الباب ما كَف الوجع بالباب بسمار رمح بالطف رجع حافر صدر بي سِر الله انوضع هم راس الْحسين فوگاه انرفع وام عون الْخيام عليها تستعر ابواب الآلام فِتح باب الطهُر ▪️▪️▪️▪️▪️ قبل الخيم چان اكو باب احترگ بي تلهب النار او عالزهره انطبگ طاحت عالْتراب ضلِع من عدها طگ واحسين بالخيل من طاح انسحگ ابحافرها مطبوع دم امن الصدر ابواب الآلام فِتح باب الطهُر ▪️▪️▪️▪️▪️ زينب عله الصار باهلها شاهِده او ورثتها الجروح من الوالِده صارت للاحباب كِلهم فاگِده وآخرها بحبال يسبوها العِده وگفوها بالسوگ او بقصور الكفر ابواب الآلام فِتح باب الطهُر ▪️▪️▪️▪️▪️ ابو الحسن الوائلي

▪️▪️▪️▪️▪️ حيدر عجب ما حانت منيته لمّن باللحد وسّد ام بيته امتعّبته المصيبه بفراگ الحبيبه ▪️▪️▪️▪️▪️ ايساعد الله گلُب حيدر من دِفن فاطمه الزهره نُفض چفّه امن التُراب او ناح والدمعات حمره اتبيّن ابوجهه فگدها او بَينت ابصفنِته الكسره وسّدها روحه بالگبُر بيّن عله الحِيد الكسُر والفحل بفراگ الطهُر الهوه ابريته صار حسره كسروا ظهره بالزهره ابقتلها حرموا منها الف وسفه بعلها يتعاله نحيبه بفراگ الحبيبه ▪️▪️▪️▪️▪️ گعد فوگ الگبر حاسر ينحب ابهاي الرزيّه او علي لو ما صبُر گلبه يندفن يم الزچيّه القبِل چانت تجلي همّه حرمته منها المنيّه هيهات يرتاح او دِفن جوّه التراب ام الحسن والراحه والفرحه مِشن امن ايد حمّاي الحميّه صارت ظلمه بعيونه حياته من ودّع علي كل امنياته روحه اضحت غريبه بفراگ الحبيبه ▪️▪️▪️▪️▪️ چان يرجع من حروبه اسهام متصوّب تصدّه ينكسر گلْب الوديعه الحالتِه او تگعد تضمده راحت الچانت تعزّه ضل ابو الحملات وحده چف اليداوي حيدره محروگ شافه ابنظاره او زرگه چفوف الطاهره من سياط الردي او عَبده من غسّلها ابو الحمله تحسّر شاف السطره والضلْع التكسّر ما يخمد لهيبه بفراگ الحبيبه ▪️▪️▪️▪️▪️ علي ما تنعد جروحه او گلبه من الحزن ذايب النعش شاله ابچتفه گوّه منهدم ليث الحرايب شعره أسود طلع بيها او رجع من الدفن شايب ودّعها بالهم والقهر ناحل او مكسور الظهر يشبه اهِلال اوّل شهر صوّبت چبده النوايب همّه اجبال ما تگدر تحمله والبسمار لوعه ابگلبه خلّه بس موته طبيبه بفراگ الحبيبه ▪️▪️▪️▪️▪️ علي شاف البيت وحشه صار من ماتت زهرته راحت الچانت تسنده او توگف اوياه ابمحنته الفاطمه مكسور ظهره او بُگه الكرّار ابغربته من فتح بابه المرتضى اتذكّر ضلوع امرضرضه بالمدمع الخد فيّضه صعب تتوصّف كسرته مهموم الوصي والراس حاسر شاف اولاده مكسورين خاطر حالتهم عجيبه بفراگ الحبيبه ▪️▪️▪️▪️▪️ ابو الحسن الوائلي