•{ليش تروحين}• ليش تروحين مو وكت غروب هذا التوقيت يوجع الِگلوب المغرب غمّضتي عيونچ شيخلص الليل بدونچ ١/ غمّضتي يحلى وطن...فرّقنه يعني الزمن حاچيني يمّ الحسن...ضاگت بعيني السمه وين التّعاين إلي...و تفهم شنو بداخلي معقوله يحچي علي... بس فاطمه ما ترد يا فاطمه آنه علي چا ما تردّين فتحي العيون محلّفچ بعيون الحسين بإيديچ أشيل بدمعتي و اتطيح الإيدين راح ايسمعون صوتي الشمات گعديلي بساع مو حيدر مات فدوه الدمعات جفونچ شيخلص الليل بدونچ ٢/ مو گلنه نبقى سوى...جرح آنه و انتي الدوه ليش إيدي بيد الهوه...و ظل وجهي بعدچ خِلي گلتيلي مره اذكرت...شتسوي إذا آني متت؟ و آنه بدموعي گلت...أكبر خساره لعلي صارت صدگ يم الحسن يا أغلى الأحباب چنت امن أجي تطلعين إلي بأهلًا يبو تراب هسه ألگه گدامي منو من أفتح الباب راح ألگه فراغ مو أم الدار و بگلبي أصيح آه يالبسمار و آه يا ضربات متونچ شيخلص الليل بدونچ ٣/ يا قمري و زهرتي...يا سندي بدنيتي إنتي سبب بسمتي...ضامي و لگيتچ نهر حسدونه بأول عمر...و انتي سكنتي الگبر و آنه بغُرُبتي انعِصُر...إحنه گلب و انكسر مرج البحرين بعد ما نلتقي شلون بس ذكرياتچ فاطمه ظلت بالعيون ما بيننا بكسر الضلع عرفوا يفرقون راح أگضي الليل أحچي اوي البير و ما من زهراء تصبّحني بخير محلى الأيام بلونچ شيخلص الليل بدونچ ٤/ روحي يبعد الگلب...إرتاحي جوّا الترب اي كافي دمعچ يصب...منّ الوجع و الكسر يجري اعلى خدّچ دمع...و فوگاها خد منصفع يا ويلي كسر الضلع...من يبدي وكت العصر روحي يفاطم للنبي و احچيله كلشي گليله من كسر الضلع محنيّه أمشي كل ليله كل ساعه انقهر و اعليّه مغشي گليله القوم سطرولي العين و ضلعي كسروه و آنه ام حسين لو گال الهادي شلونچ شيخلص الليل بدونچ ٥/ بالعافيه اعلى اللحد...نايم بوسطه الورد ظليت أروح و أرد...امن البيت للمگبره بكل حرب أنا انتصرت...بس وحده بيها حرت بحرب الفراگ اخسرت...فاگد الزهره ترى يوصيني سلمان الصبر و آنه أحچي حزنان سلمان هذي فاطمه شصبر يسلمان أشعر بضلعي ينكسر لو شفت بيبان بعد الزهراء ما ظل كل حيل الفاگد محبوب ميرحمه الليل هونچ يا فاطم هونچ شيخلص الليل بدونچ *الشاعر الموفق ميثاق الحمداني* رابط قصيدة "ليش تروحين": https://youtu.be/VMnjPMrGHn8?is=YCJTgZxXdUi2STbl _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane

•{عزاء أم الحسن}• ما مثله بالدنيه وطن...مجلس عزاء أم الحسن ١/ وطن عندي ماكو مثله و ماكو عندي غيره مجلس أم الحسن و آنه عايش بنص خيره أشكر الله و الزچيه بنعمه إحنا چبيره هالوطن خيمه علينا و أهله أهل الغيره عنوان بيتي و السكن...مجلس عزاء أم الحسن ٢/ امن الصغر و اليومي هذا ما گطعت الخدمه الخدمه نعمه و ياهو بالله يعوف هاي النعمه؟ الما گطع ويه الزچيه بحقه نحچي كلمه إبن أبوه هذا و طاهر والله مرضع أمه و ارواحنا اهنانه التقن...مجلس عزاء أم الحسن ٣/ بدينه موسى بدينه عيسى و المَثَل گايلها و آنه حُب الزهره ديني و آنه مخلوق إلها أختصرها من الأخير و حتى ما طوّلها آنه دين اللطم ديني الناس ما جاملها كلمن سأل تابع لمن؟...مجلس عزاء أم الحسن ٤/ ماكو واحد عاف بيته و عاف كل مُلكيته لجل فاطم هذا آني العاف أهله و بيته صح تركت أهلي و ناسي و الضّنه خليته لكن اهنا عطر أمي بهالعزه شميته يا عطر من جنّة عدن...مجلس عزاء أم الحسن ٥/ الناس لو حاجة گضتلي چبيره عندي هايه و فاطمه مو حاجة وحده واگفتلي اهوايه الخدمه ماي و جرف آنه و خل اگول حچايه الجرف معروف طبعه ما يفارگ مایه أحضر ولو عظمي وهن...مجلس عزاء أم الحسن ٦/ شگد عنواين التغيرت كلمن و عنوانه و آنه ما أترك الزهره آنه باقي اهنانه الزهره بالحلوة و المُرّة هيه دوم اويانه شلون تالي عمري بالله عنها أبعد آنه أحيي أظل طول الزمن...مجلس عزاء أم الحسن *الشاعر الموفق أنيس الخفاجي الكربلائي* رابط قصيدة "عزاء أم الحسن": https://youtu.be/pz77bLakbUI?is=AJGor6EcQKuSeJbn _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane

•{دگينه بابچ فاطمة}• دگينه بابچ فاطمه اوي الوادم الفُقره و صحنا مثل ما خِدمِتِچ جمعتنا عالفطره بخيمة حنانچ للأبد خلينه يالزهره ١/ إنتي أمنا اللي تضمنه حتى لو نوجع ضلعها و تمسح بدمعة خدمها و هيّه ما تمسح دمعها إنتي يا أم الحسن أم المَحَنّه و الأمان العايشيه ببيوت أهلنا يُمّه لطفچ الله لا يحرمنا منّه عيشتنه الچ منّ الأزل من الله موعوده بهذي القصايد و اللطم و هدومنه السوده ما ردنه اجر عن التعب ردنه فقط نظرة ٢/ طاب ضلعچ طاب متنچ طابت إيدچ لو بعدها؟ و أكو شي ما إله طيبه فاطمة يسطرون خدها عنچ يگولون يالزهره نحيله و اللعين الصافعچ إيده ثگيله بحيث دم عينچ على خدچ مسيله للموت أظل أجري الدمع يالزهره لمصابچ و عالمحسن المنچ غصب طايح على اعتباچ وين اليجي يدلّي الخدم عن گبرچ و گبره ٣/ اثمنطعش عمرچ و رحتي ما بقيتي يالزچيه و انحرمنا امن احن مشهد شايله بإيدچ رقيه رحتي ما شفتي الحسين شصار عنده چانت امنيتچ تگعدين اويه ولده و تجي سكينه تگلچ شلونچ يَجَدّه و من شوفة اولاد الحسن محرومه يا فاطم اي ما سمعتي كلمة "اليُمّه" من القاسم الأكبر يشبهچ فاطمه و ما شافچ بعمره ٤/ لا تحرميني البواچي و آنه الچ مخلوق دمعي والله أتخيل حرگتچ من تگولين آه يضلعي نومة المكسور ضلعه تبچّي كل عين كسر ضلعچ ما يحس بيه بس الحسين و زينب اتدوّر لضلعچ عالدوا منين ويلي على البنت التي زادت على أمها زينب يشوفوها الزلم من توگع خيمها و عالهزلة تركب و العدو ما يرحم بأسره ٥/ تنقضي الحاجات كلها بالليالي الفاطميه و حاجتي يگولون عني مات حرگه اعلى الزچيه أرد اموت امن البچي و مجروح الاحساس من يگولون الزچيه معصّبه الراس و الضلع يتحرّك شما جرّت أنفاس گالوا خيال من الألم يم الحسن صرتي و زينب تون و اتناشدچ معقوله هاي انتي؟ يا زهرة الله و كوثره امن الحرگه متغيره *الشاعر الموفق ميثاق الحمداني* رابط قصيدة "دگينه بابچ فاطمة": https://youtu.be/DTHj3q4Kp2M?is=tvUiAqisGov9lKI2 _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane