-اعوفكم ويا الاغنية لعل مسامعك او مخيلاتكم تسعفكم لتخيل الموقف.

الدرب چان يمر وچان اكو هدوء غريب بيني وبين والدي هدوء مو معتادين علي السيارة چانت تطوي الشوارع بوسط سكون تام، سكون تكدر من خلاله تحس بأمان ومحبة ما يحتاج تنحجي وفجأة، يطلع صوت فيروز ويغير الموازين السكون والصمت اللي چنه نستمتع بي انا و والدي اختفىٰ فجأة وكأنه لم يكن صوت فيروز اللي ملأ مسامعنا وهي تكول: تعا ولا تجي وأكذب علي الكذبة مش خَطية أوعدني أنو راح تجي وتعا ولا تجي… بهذيج اللحظة بالذات السيارة بطلت تكون مجرد وسيلة نقل بالطريق، وصارت مساحة معلقة بين الواقع والرجاء. وتصير الجذبة الدافية أرحم بهواي من الحقيقة نفسها! الاغنية جانت تحجي عن "كاتيا" اللي تعلقت "بعسكري" بخلال ازمة لبنان 1958. وفجأة انتشر خبر انو توفى او خاين وكاتيا اختارت القصة الأقل الماً لگلبها اختارت انو يكون خاين حتى علىٰ الأقل يكون عندها أمل انو بيوم من الايام ممكن فعلاً يرجعلها وجانت تنتظر انو يرجع، أو حتى لو ما كدر يجي يدزلها أي خبر يطمن گلبها حتىٰ تظل تحس أنو هوَ عايش! ف هيَ تطلب ومن خلال الأغنية انو هوَ يرجعلها حتى لو جان يجذب عليها تكله اوعدني انو انت راح تجي! بس لا تجي لانو بكل بساطة تعرف مصيرة شنو اذا رجع وهوَ خاين. وهيج، تبقىٰ الأغاني مو بس أصوات نسمعها ونعديها، احياناً وبهواي اوقات تكون مأوىٰ للناس وتذكير بأنو الجذبة الدافية احياناً أرحم بهواي من مرارة غياب مو واضح! وأن الأشتياق الحقيقي هو اللي يخلينا نرضى حتىٰ بالوهم، بس المهم أنو نبقىٰ نحس انهم بعدهم ويانا، بعيدين.. بس عايشين🌟