Oʻzbekistonga iqlimga chidamli landshaftlar dasturi uchun 103,7 million yevro yoʻnaltiriladi Markaziy Osiyoda iqlim oʻzgarishiga chidamli landshaftlar (CLiCA) mintaqaviy dasturi doirasida Oʻzbekistonga 103,7 million yevro yoʻnaltiriladi. Dastur Oʻzbekiston, Qirgʻiziston va Tojikiston hamkorligida, xalqaro sheriklar koʻmagida ishlab chiqilgan. Yetti yilga moʻljallangan dasturni moliyalashtirishga ajratiladigan mablagʻlarning umumiy hajmi 264,4 million yevroni tashkil etadi. Mablagʻlar oʻrmon va yaylovlarni tiklash, qishloq xoʻjaligida iqlim oʻzgarishi sharoitida barqaror yondashuvlarni joriy etish, tabiiy resurslardan oqilona foydalanish hamda qishloq aholisining iqlim oʻzgarishiga moslashish imkoniyatlarini kengaytirishga yoʻnaltiriladi. Dasturga Antaliya shahrida BMTning iqlim oʻzgarishi boʻyicha konferensiyasi (COP31) doirasida start berildi. Prezident Shavkat Mirziyoyev sammitning ochilish marosimida ishtirok etdi. @geschaft_7

Osiyo taraqqiyot banki Oʻzbekiston chorvachiligiga 60 million dollar imtiyozli qarz ajratadi Osiyo taraqqiyot banki (OTB) Oʻzbekistonda oziq-ovqat xavfsizligini mustahkamlash, qishloq aholisi turmush darajasini yaxshilash va chorvachilikni barqaror rivojlantirish uchun 60 million dollar imtiyozli qarz ajratishni maʼqulladi. Mablagʻlar “Chorvachilikni barqaror rivojlantirish” loyihasi doirasida Buxoro, Qashqadaryo, Navoiy, Samarqand viloyatlari va Qoraqalpogʻistondagi 29 ming kichik fermer xoʻjaligini qoʻllab-quvvatlashga yoʻnaltiriladi. Loyiha yem-xashak bazasini yaxshilash, veterinariya xizmatlarini kuchaytirish va yaylovlarni samarali boshqarishni nazarda tutadi. Qurgʻoqchilik, haddan tashqari issiq va suv tanqisligiga moslashish uchun sunʼiy intellekt asosidagi yaylov monitoringi tizimi hamda fermerlar uchun mobil ilova joriy etiladi. OTB qarzidan tashqari, Yashil iqlim jamgʻarmasi 5 million dollar, Yaponiya hukumati jamgʻarmasi 3 million dollar grant ajratadi — loyihaga jami 68 million dollar yoʻnaltiriladi. OTBning Oʻzbekistondagi vakili Kanokpan Lao-Araya taʼkidlashicha, chorvachilik qishloq aholisi uchun muhim daromad va oziq-ovqat manbai hisoblanadi, biroq soha qurgʻoqchilik, haddan tashqari issiq va suv tanqisligi taʼsiriga duch kelmoqda. @geschaft_7

Fitch «Oʻzbektelekom» mustaqil kredit reytingini «bb» darajasiga koʻtardi Xalqaro reyting agentligi Fitch Ratings 9-noyabr kuni «Oʻzbektelekom» aksiyadorlik kompaniyasining mustaqil kredit profilini (SCP) «bb-» darajasidan «bb» darajasiga koʻtardi. Mustaqil kredit profili kompaniyaning davlat koʻmagini hisobga olmagan holdagi oʻz moliyaviy layoqatini aks ettiradi. Agentlik maʼlumotiga koʻra, bu koʻrsatkichning koʻtarilishi kompaniyaning moliyaviy va operatsion natijalari yaxshilanganini bildiradi. Yangi baho endilikda Oʻzbekistonning suveren reytingi darajasiga mos keladi va Fitch baholaydigan Oʻzbekiston kompaniyalari orasida eng yuqori koʻrsatkichlardan biri hisoblanadi. Shuningdek, kompaniyaning uzoq muddatli defolt reytingi «Ijobiy» prognoz bilan «BB» darajasida tasdiqlandi. Fitch maʼlumotiga koʻra, bu baho kompaniyaning xalqaro moliya bozorlaridagi mavqeini mustahkamlaydi va faoliyatini rivojlantirish uchun mablagʻ jalb qilish imkoniyatlarini kengaytiradi. @geschaft_7