س: من أين أتت سيرة الصحابة؟ ج: من القرآن الكريم، والسنة النبوية، وكتب السير. طيب جميل : القرآن هو اللي قال عن أبو بكر: {إِذْ هُمَا فِي الْغَارِ} والقرآن هو اللي قال عن الصحابة كلهم: {رَّضِيَ اللَّهُ عَنْهُمْ وَرَضُوا عَنْهُ} والقرآن هو اللي قال: {مُّحَمَّدٌ رَّسُولُ اللَّهِ ۚ وَالَّذِينَ مَعَهُ أَشِدَّاءُ عَلَى الْكُفَّارِ رُحَمَاءُ بَيْنَهُمْ} والسنة هي اللي قالت: لو كان بعدي نبي لكان عمر والسنة هي اللي قالت: ما ضر عثمان ما فعل بعد اليوم والسنة هي اللي قالت: أبو بكر في الجنة، وعمر في الجنة، وعثمان في الجنة" وكتب السير هي اللي نقلت لنا كيف عاشوا، وكيف ماتوا، وكيف فتحوا البلاد، وكيف عدلوا، وكيف زهدوا. يبقى اللي بييجي يشتم سيدنا أبو بكر وعمر وعثمان، جاب شتيمته منين؟ هل جابها من القرآن؟ لا، القرآن زكاهم. هل جابها من السنة؟ لا، السنة مدحتهم. هل جابها من السير؟ لا، السير أثنت عليهم. أمال جابها منين؟ جابها من هواه، من حقده، من كتب المستشرقين والملاحدة اللي بيكرهوا الإسلام، وعايزين يهدوه من جوه. اللي بيطعن في الصحابة، بيطعن في المصدر نفسه اللي عرفنا منه الصحابة. لأنك لو شككت في القرآن والسنة والسير، يبقى انت معندكش أي مصدر تعرف منه مين أبو بكر أصلًا. ولو صدقت القرآن والسنة والسير، يبقى لازم تصدق أنهم عدول، مرضي عنهم، مبشرين بالجنة. مفيش حل تالت : يا تاخد المصادر كلها، وتسكت وتترضى عنهم. يا ترفض المصادر كلها، وتبقى انت بلا دين أصلًا، ولا تعرف مين هو النبي نفسه. إنما تاخد من السيرة اللي يعجبك، وتسيب اللي يفضح كذبك، وتقول دي سيرة مزورةودي سيرة صحيحة، على مزاجك، ده اسمه تدليس مش علم. وبالنسبة لكلامك كانوا بيحاربوا من أجل المال! طيب تعالى نشوف : 1. سيدنا أبو بكر: اللي أنفق ماله كله للدعوة سيدنا ابو بكر كان من أغنى تجار قريش، كان عنده 40 ألف درهم. أول ما أسلم، بدأ يصرفها كلها في سبيل الله. اشترى بلال بن رباح وهو يُعذب في الشمس، ويتحط على صدره حجر، ودفع فيه ثمن غالي، واعتقه لوجه الله. اشترى عامر بن فهيرة، وزنيرة، والنهدية، وابنتها، وكل المستضعفين اللي كانوا بيتعذبوا عشان أسلموا. لحد ما أبوه، أبو قحافة، قاله: يا بني، إن كنت تعتق، اعتق أقوياء ينفعوك، قاله: يا أبتِ، إنما أريد ما عند الله. ولما هاجر، ماخدش معاه غير 5 آلاف، والباقي كله راح في الدعوة. ولما سأله النبي: "ما أبقيت لأهلك؟" قال: "أبقيت لهم الله ورسوله". ده واحد بيحارب عشان المال ولا ماله الخاص أصلا ما أتمتعش بيه؟ 2. سيدنا عمر: سيدنا عمر بقى كان أمير المؤمنين، وحاكم نص العالم، من فارس للشام لمصر ،كان يقدر يعيش في قصر، وياكل أحسن أكل. كان أكله إيه؟ خبز وزيت. ولو لقى خبز ولبن يبقى عيد. في مرة، بطنه كانت بتصوت من الجوع من أكل الزيت، فخبط على بطنه وقال: قرقري أو لا تقرقري، والله لا تذوقين اللحم حتى يشبع منه أطفال المسلمين وفي عام الرمادة، لما حصلت المجاعة، حرم على نفسه اللحم والسمن واللبن، وقال: كيف آكل اللحم والناس جوعى؟، لحد ما وشه اسود من أكل الزيت، وبقى يقول: بئس الوالي أنا إن شبعت والناس جياع. ده واحد بيحارب عشان المال؟ ده واحد كان المال تحت رجله، وهو سايبه وبياكل زيت ومية. 3. سيدنا عثمان: اللي اشترى الجنة بماله سيدنا عثمان كان أغنى واحد فيهم، وكان تاجر شاطر.بس ماله كان لله، مش للدنيا. المسلمين كانوا عطشانين في المدينة، والبئر الوحيد بتاع واحد يهودي بيبيع المية غالية. راح عثمان اشترى بئر رومة بـ 20 ألف درهم، ووقفها للمسلمين كلهم يشربوا ببلاش. المسجد ضاق بالمسلمين، راح اشترى الأرض اللي جنبه من ماله، ووسع المسجد. وجيش العسرة، جيش تبوك، في عز الحر والفقر، مفيش فلوس ولا سلاح. قام عثمان جهز الجيش لوحده: 1000 بعير، و70 فرس، و10 آلاف دينار ذهب، وحطهم قدام النبي ،لحد ما النبي قال وهو يقلب الفلوس: ما ضر عثمان ما فعل بعد اليوم بقلم : أ . #أحمد_المهيدي