HashiCorp (Terraform, Vault) va Ghostty asoschisi Mitchell Hashimoto yangi mahsulot quryapti: Rex. Hozircha bu mahsulotni juda yaxshi terminal deb hisoblasa bo’ladi, lekin kelajak uchun rejalar katta. 2-3 haftadan buyon ishlatyapman, tajriba boshqa dasturlardan ko’ra 3-4 barobar yaxshi: tezligi, UX, animatsiyalar, kichik detallari, Claude Code kabi uskunalar bilan integratsiyasi. Muhabbat bilan qilinganligi yaqqol ko’rinib turibdi. Ochiq test qilish yaqindan boshlandi. Bu yerda navbatga yozilsa bo’ladi: https://www.superlogical.com/updates/public-testing-beginning

Andrej Karpathy HackerNews saytida tavsiya qilingan videolardan HackerTube katalogini qilibdi: https://hackertube.org 43 millionta izohlar asosida yaratilgan. Qanday qurgani haqida qisqacha: https://x.com/karpathy/status/2116957135661945283 Kimdir undan ilhomlanib kitoblar uchun ham katalog qilgan: https://hackerbooks.org/#/top Soha bo’yicha keyingi video yoki kitobni tanlashda asqotadi.

Mahsulot injeneri Sun’iy intellekt kod yozishning katta qismini o’ziga olayotganda, ko’pchilikda “dasturchilarning vazifasi nima bo’ladi,” degan savol tug’ilgandi. Lekin SI bu darajada rivojlanmasidan oldin ham javob bo’lgan. Dasturchi yozadigan kod, aslida, kodligicha qolmaydi - mahsulotga aylanadi. Mahsulot ishlab chiqarishning boshqa tomonlari ham bor: qaysi muammoni yechish, qanaqa yechish, qanday foydalanuvchilarga yetkazish, sifat va xavfsizlik kabi. Shularni ham eplaydigan, kod va texnik stekdan “yuqoriroq” ishlaydgian dasturchilar doim qadrlangan; va ularning nomi - mahsulot injeneri. Mahsulot injeneri haqidagi eng yaxshi maqolani PostHog kompaniyasi yozgan (saytini juda yaxshi ko’raman): What is a product engineer? Mahsulot injenerining asosiy uchta xislati: • haqiqiy foydalanuvchilar uchun mahsulot quradi • to’liq stekda kod yozadi • foydalanuvchilarning eng dolzarb va muhim muammolarini hal qilishga chin dildan intiladi. Qisqacha, bu xuddi interfeys chizadigan dizayner va mahsulot dizaynerining farqi kabi: birinchisi qanaqa ko’rinishiga e’tibor beradi, ikkinchisi foydalanuvchi tajribasiga. Deyarli hamma kompaniyalar uchun mahsulot injenerlarini ishga olish muhimlashib boradi. SI har bir stekda juda yaxshi kod yozishi mumkin. Lekin, chiqariladigan qarorlarni SI to’liq o’ziga ololmaydi. Mahsulot injeneri esa mahsulot, dizayn, sifat, umuman, foydalanuvchi tajribasiga ta’sir qiladigan qarorlarning ko’pini o’zi chiqara oladi. Linear, PostHog, incident.io, Supabase, Cursor kabi kompaniyalar ishga olishda mahsulot injenerlariga hozir ham fokus qiladi. Faqat kattaroq, o’ziga xos kompaniyalar uchun biror stekda chuqur bilimga ega bo’lgan dasturchilar muhimligicha qoladi. Mahsulot injeneri - nisbatan kengroq tushuncha: “founding engineer,” “forward deployed engineer” kabi rollar ham aslida shu kategoriyaga kiradi.