عشت في مجتمع منافق، مجتمع يلبس أقنعة الطيبة ويخفي خلفها ألف وجه من الحقد والخبث. ناس تحچي عن الأخلاق وهي أبعد ما تكون عنها، وناس تنصحك بالصدق وهي أول من يخون، وناس تبتسم بوجهك وتطعن بظهرك وكأن النفاق صار من شيمهم. تعبت من زمن صار بيه الصادق غريب، والطيب يُستغل، وصاحب القلب النظيف ينجرح من أقرب الناس إله. صاروا يتقنون دور المظلوم وهم أصل الظلم، ويحچون عن الوفاء وهم أول من يتخلى، وإذا شافوك بخير تضايقوا، وإذا تعثرت فرحوا، وإذا احتجتهم اختفوا وكأنك ما كنت يوم من الأيام سند إلهم. عشت بمجتمع علّمني أن مو كل من يضحك بوجهك يحبك، ومو كل من يحلف بطيبتك يتمنالك الخير، ومو كل من يحچي عن المبادئ عنده مبدأ. مجتمع غريب، يقيس الناس بالمظاهر، ويحكم على القلوب من كلام الآخرين، ويصفّي حساباته باسم النصيحة، ويخفي حقده خلف كلمات المحبة. لكن رغم كل هذا، يبقى الشي الوحيد اللي أفتخر بيه أني ما خليت نفاقهم يغيّر أصلي، ولا خبثهم يعلّمني الخبث، ولا قسوتهم تسرق مني طيبتي. يمكن تعبت، ويمكن خذلتني وجوه چنت أحسبها أمان، بس ما أريد أصير نسخة منهم حتى أگدر أعيش بينهم. مو كل خسارة خسارة، مرات خسارة بعض البشر هي النجاة الحقيقية، ومرات انكشاف الوجوه نعمة حتى لو إجت على شكل وجع .