تعرف مين الصحابى اللى كان بيخاف من دماغه أول ما يحس إنها اشتغلت ؟؟ الصحابى ده كان من أدهى دهاة العرب على الإطلاق و كان يتفوق على عمرو بن العاص و معاوية بن أبى سفيان فى الدهاء بمراحل .. معاوية نفسه كان بيخاف منه و حاول كتير هو و عمرو بن العاص إنهم يستقطبوه لصفهم وقت الفتنة بين على و معاوية و ازاحوه عن ولاية مصر بخدعة خوفا من دهائه .. ناس كتير ما تسمعشى عنه أو اسمه مش مشهور أوى زى أسماء الصحابة المشهورين فى التاريخ الإسلامى .. كان من الأنصار و كان محبوب جدا من صغره بسبب ذكاءه لدرجة إن كان الكبار بياخدوا رأيه و مشورته فى أمور كبيرة و هو لسه شاب صغير عشان كان باين عليه الذكاء و النباهة و براعة الحيلة .. و عشان كان بيقعد وسط ناس كبيرة فى مجالسهم و مالوش لحية كانوا يقولوا : لو نقدر نشترى له لحية بكل مالنا كنا اشتريناله عشان يبان عليه الوقار و الهيبة فى المجالس و يعملوه كبير المجلس .. و لإنه كان مشهور من صغره بالدهاء و الحيلة كانوا بيلقبوه لما كبر بلقب : ( أدهى العرب لولا الإسلام ) .. و كان الرسول صلى الله عليه وسلم بيحبه و مقربه منه و كان عامله زى وزير الداخلية كده فى الدولة و دا هو وصف سيدنا أنس بن مالك لمكانة هذا الصحابى عند الرسول قال عنه أنس : " كان مع رسول الله بمنزلة صاحب الشرطة للأمير " .. و فى معركة صفين كان مع سيدنا على ضد معاوية و كان يقعد يعمل خطط ما تخرش المياة و ممكن بها يوقع معاوية و جيشه فى يوم واحد و بعدين يفتكر آية " ولا يحيق المكر السيئ إلا بأهله " فيستغفر ربنا و يقول : " و الله لئن قُدِّر لمعاوية أن يغلبنا فلن يغلبنا بذكائه بل بورعنا و تقوانا " .. و كان دايما يقول مقولته المشهورة : " لولا الإسلام لمكرت مكرا لا تطيقه العرب " هو نفسه فعلا كان بيخاف من دماغه لما تشتغل فى المكر كان بيحس إن دماغه تقدر تعمل مصايب بس هو لجمها بالإسلام .. كان دايما يقول لنفسه عشان يكبح جماحها عن المكر : لولا أني سمعت رسول الله ﷺ يقول : " المكر والخديعة في النار " لكنت أمكر هذه الأمة .. و اتعد من دهاة العرب الخمسة : _ كان هو الأول لإن معاوية نفسه كان بيخاف من مكره و قال عنه وقت الفتنة إن دا بالذات رأيه و مكيدته أخطر على جيش معاوية من 100 ألف مقاتل .. _ معاوية بن أبى سفيان _ عمرو بن العاص _ المغيرة بن شعبة _ عبد الله بن زياد .. و مع ذلك كله كان كريم جدا و سخى و صاحب جود و وارث الكرم من بيت أهله و الرسول ﷺ كان معدى جنب بيت أهل الصحابى ده فى يوم فشاور ع البيت و قال للى ماشيين معاه عن بيت أهل الصحابى ده : " إن الجود شيمة أهل هذا البيت " .. فى يوم كان مريض و كان قبل مرضه بشوية بايع حاجة لمعاوية بتسعين ألف فأول ما قبض تمنها نادى في المدينة : " اللي عايز سلف يجي ياخد اللى عايزه " و وزع منها سلّف 40 ألف ووزع الباقي هدايا و صدقات ع الناس .. فلاحظ أيام مرضه إن ماحدش راح زاره فاستغرب و سأل مراته هو ماحدش جه يزورنى ليه هى الناس مش عارفة إنى مريض ؟؟ قالت له : ما إنت ليك فلوس كتير عند الناس و مكسوفين يجوا يزوروك عشان عليهم فلوس فقالها : خلى منادى يلف فى المدينة و يقول : " من كان عليه دين لى فهو له " لقى الناس كلها راحت تزوره لحد ما سلم البيت وقع و اتهد من الزحمة و التدافع من كثر الناس .. لما كان يسلف حد و يروح يرجَّع له الفلوس كان يقوله : " نحن قوم إذا أعطينا شيئا لا نرجع فيه " و ما يرضاش ياخدهم تانى .. كان له دعاء دايما بيدعيه على طول بيقول : " اللهم ارزقنى حمدا و مجدا فإنه لا حمد إلا بفعال ولا مجد إلا بمال اللهم لا يصلحنى القليل و لا أصلح عليه " .. الصحابى ده هو ابن سيد الخزرج .. 👇 قيس_بن_سعد_بن_عبادة_الخزرجى رضى_الله_عنه_و_عن_أبيه .. 💚

من أشـد أنواع الغفـلة، أن تصـاحب أشخاص يمهدون لك الطـريق لجهنم تحـت مسمىٰ استمـتع بشـبابك.. ﴿ فَلاَ تَغُرَّنَّكُمُ الْحَيَاةُ الدُّنْيَاؐ ﴾

‏ويحكَ؛ لا تحقر نفسكَ فالتائبُ حبيب🤎! ابن القيم.