Телеграм канал «АКЫРЕТКЕ ДАЯРДЫК🕌🕋»

🔰 ҮЧ НАСААТ.

Бисмиллаахир Рохмаанир Рохиим.

Окурманым, сага айтар үч осуятым бар: ( керек жерде керең бол - тынч жашайсың; нээматтарды эстей жүр - топуктуу болосуң; жаратылышка баам сал - таң каласың ).

Биринчиси, керек кезде керең бол - жашооң тынч болот; көралбастын көзүнө, ичи тардын сөзүнө көңүл бурба. Өз жолуң менен кете бер. Береке тапкыр, *"бекерчиден безе кач"* деген ушу, алар менен талашып-тартышып отурба. Өзүңдү бил, башкага кийлигишпе. Ошон үчүн күбүр-шыбырды укмаксан бол, алардын айтканы кумга сиңип жок болот.

Экинчиси, нээматтарды эсте - топуктуу болосуң. Аллах тартуулаган өзүңдөгү нээматтарды дайыма эсте. Ыйманыңды, ден соолугуңду, акыл-эсиңди, тынчтык, бейпилдикти, ырыскыны, жумушту ж.б. нээматтарды ким берди, кайдан келди ушуну дайыма ойлой жүр. Буларды эстеген сайын, Аллахка шүгүр кыласың, шүгүр кылган сайын көкүрөгүң ачылып, жаның тынч алып, денең кубаттанып, ынсап-топуктуу болосуң.

Үчүнчүсү, айланаңа көз чаптырып Жараткан чеберчилик менен жасаган жаратылышка баам сал. Жаратылышы Жараткандын жалгыздыгы тууралуу аяттарды, жаратып жатканда эч нерсеге муктаж болбогон кудуретин оку.

Көз жоосун алган бак-даракка кара, көк тиреген тоолорго тигил, түшүп кетпей салаңдаган булуттарга, көз кубаты жетпеген мейкинге үңүл. Баш-аягы көрүнбөгөн чөлдөр, кирген-чыккан суусу жок көлдөр, ийри-буйру дарыялар кайдан, кантип пайда болду? Дарактар, гүлдөр, даамы бириники бирине окшобогон мөмө-жемиштерчи? Ойлон, акыл жүгүрт, анан Кемчиликсиз Жаратканды мактап аруула. Анын чеберчилигине таң калбай койбойсуң, акылың да жетпейт, андыктан дагы бир жолу Аны мактап аруула.

Мына ушул үч осуятты унутпа.

(Керек жерде керең бол - тынч жашайсың; нээматтарды эстей жүр - топуктуу болосуң; жаратылышка баам сал - таң каласың ).

📗Булагы: Бакыттын сырын ачтым

https://t.me/Akyretke_daiardyk