လူမှုကွန်ရက် တစ်တော့ပေါ်တွင် PDF များကို စိန်ခေါ်ခဲ့သည့် စစ်သား ကော့ကရိတ်-ကျုံဒိုးအစပ်တွင် အရှင်ဖမ်းဆီးရရှိသော်လည်း လက်နက်လုယက် ထွက်ပြေးသဖြင့် ပစ်ခတ်ခံရပြီး သေဆုံး နိုဝင်ဘာ ၁၀ လူမှုကွန်ရက် TikTok ပေါ်တွင် PDF များကို စိန်ခေါ်သည့် အကြောင်းအရာများ တင်ခဲ့သည့် စစ်သားတစ်ဦးကို နိုဝင်ဘာ ၇ ရက် ညနေပိုင်းတွင် ကရင်ပြည်နယ်၊ ကော့ကရိတ်နှင့် ကျုံဒိုးမြို့နယ်အစပ်၌ အရှင်ဖမ်းဆီးရမိခဲ့သော်လည်း ဖမ်းဆီးခံထားရစဉ် လက်နက်လုယူ၍ ထွက်ပြေးရန် ကြိုးပမ်းခဲ့သဖြင့် ပစ်ခတ်ဖမ်းဆီးရာ သေဆုံးသွားကြောင်း သိရသည်။ အဆိုပါစစ်သားကို နိုဝင်ဘာ ၇ ရက် ညနေ ၄ နာရီခန့်တွင် ဖမ်းဆီးရမိခဲ့ခြင်းဖြစ်ပြီး ၎င်း၏ဖုန်းအတွင်း၌ PDF များကို စိန်ခေါ်ထားသည့် TikTok လူမှုကွန်ရက်ပေါ်မှ အကြောင်းအရာများကို တွေ့ရှိခဲ့ကြောင်း သိရသည်။ “တစ်တော့ပေါ်မှာ PDF တွေကို စိန်ခေါ်နေတဲ့သူပါ။ သူ့ဖုန်းထဲမှာလည်း PDF တွေကို စိန်ခေါ်ထားတဲ့ အကြောင်းအရာတွေ တွေ့ရတယ်။ နိုဝင်ဘာ ၇ ရက်နေ့ ညနေ ၄ နာရီလောက်မှာ ကော့ကရိတ်နဲ့ ကျုံဒိုးအစပ်မှာ အရှင်ဖမ်းမိခဲ့တာပါ” ဟု တော်လှန်ရေးသတင်းရင်းမြစ်က ရှင်းပြသည်။ ဖမ်းဆီးရမိပြီးနောက် အဆိုပါစစ်သားသည် ဖမ်းဆီးထားသူများထံမှ လက်နက်လုယူကာ ထွက်ပြေးရန် ကြိုးပမ်းခဲ့ကြောင်း၊ ထို့ကြောင့် ပစ်ခတ်တားဆီးခဲ့ရာ သေဆုံးသွားခြင်းဖြစ်ကြောင်း သိရသည်။ “အရှင်မိပြီးမှ ထွက်ပြေးဖို့ ကြိုးစားတယ်။ လက်နက်ပါ လုယူတဲ့အတွက် ပစ်ခတ်ခဲ့ရတာဖြစ်ပြီး အဲဒီမှာ သေဆုံးသွားတာပါ” ဟု တော်လှန်ရေးသတင်းရင်းမြစ်က ပြောဆိုသည်။ အကြမ်းဖက်စစ်တပ်က ကော့ကရိတ်-ကျုံဒိုးအစပ်တွင် စစ်ကြောင်းထိုးခြင်း၊ ကင်းလှည့်ခြင်းများကို လုပ်ဆောင်နေသဖြင့် KNLA ဦးဆောင်သော တော်လှန်ရေးတပ်များနှင့် ထိတွေ့တိုက်ပွဲများ မကြာ ခဏ ဖြစ်ပွားလျက်ရှိကြောင်း သိရှိရသည်။

အညာမြေပြင် ဟသ်ာမြေ(စာတိုများစုစည်းမှု) ကဗျာ၊သတင်းနှင့်တော်လှန်စာစဉ်များပေးပို့ရန်- @DaungNge_bot တင်ဆက်မှု Channel - https://t.me/Revolutionary02026