Телеграм канал «Zulfiqori aziz Зулфикори азиз»

Мо ки хоҳем рафт рӯзе аз канори дӯстон,
Мегузорем ин ҷаҳонро, мо барои дӯстон.

Фурсати мо чун насиме меравад аз боғи умр,
Хуш бувад он дам, ки бошем дар ҳавои дӯстон.

Ёдгорӣ ғайри некӣ нест дар ин рӯзгор,
Хуш бимонад номи мо дар моҷарои дӯстон.

Фурсати дидор кӯтоҳ асту дунё бевафо,
Ҷон фидои лаҳзае дар лобалои дӯстон.

То ки ҳастӣ аз муҳаббат гулситоне кун дуруст,
То муаттар гардад олам аз сафои дӯстон.

Дар варақҳои китобе зиндагӣ чизе набуд,
Ҷуз ҳамин меҳре, ки монда аз вафои дӯстон.

То ки хуршеди муҳаббат медурахшад дар миён,
Гул биборад ҳар куҷо бар радди пои дӯстон.

Мо ки меҳмонему бар хони ҷаҳон соҳибдилем,
Ҷон фидои хандаи беиддаои дӯстон.

Ҳайф бошад гар ба талхӣ бигзарад ин рӯзгор,
Нӯш кун ҷоме зи дасти бериёи дӯстон.

Баъди мо дар сӯги мо бар хок ашке гар чакад,
Сабза мерӯяд ба поси он дуои дӯстон.
(Нимат Ҷомӣ)

https://t.me/gazaltj

Эй офтоби саркаш як зарра хоки поят,
Оби ҳаёт рашҳе аз ҷоми ҷонфизоят.

Ҳам хоҷагии гардун дил бар вафо ғуломат,
Ҳам подшоҳи гетӣ ҷон бар миён гадоят.

Ҳам чарх хирқапӯше дар хонақоҳи ишқат,
Ҳам Ҷабраил мурғе дар доми дилрабоят.

Дар cap гирифта олам андешаи висолат,
Дар чашм карда Кавсар хоки дари сароят.

Кавсар, ки оби ҳайвон як шабнам аст аз вай,
Дарбаста то ба ҷон дил дар лаъли дилкушоят.

Сирре, ки ҳар ду олам як зарра менаёбанд,
Ҷовид каф гирифта ҷоми ҷаҳоннамоят.

Навбоваи ҷамолат моҳи нав аст, на маҳ
Банди кулаҳ зи хиҷлат дар домани қабоят.

Ту марқаби накӯӣ метозиву маҳу меҳр,
Чун соя дар рикобат, чун зарра дар ҳавоят.

То буйи зулфи мушкат пурбӯй кард ҷонам,
Аттори мушкрезам аз зулфи мушксоят.
(Фаридуддин Аттор)

https://t.me/gazaltj