Телеграм канал «WALTA TV»

አዳማ ከተማ ኢትዮ ኤሌክትሪክን አሸነፈ

አዲስ አበባ፣ መስከረም 29፣ 2019 (ኤፍ ኤም ሲ) በመጀመሪያ ሳምንት የሲቢኢ ኢትዮጵያ ፕሪሚየር ሊግ መርሐ ግብር አዳማ ከተማ ኢትዮ ኤሌክትሪክን 1 ለ 0 በሆነ ውጤት አሸንፏል፡፡

ቀን 9 ሰዓት ላይ በአዲስ አበባ ስታዲየም በተደረገው ጨዋታ የአዳማ ከተማን ብቸኛ የማሸነፊያ ግብ ቢንያም አይተን (በፍጹም ቅጣት ምት) አስቆጥሯል፡፡

ቢንያም አይተን ያስቆጠራት ግብ የ2019 የውድድር ዓመት የሲቢኢ ኢትዮጵያ ፕሪሚየር ሊግ የመጀመሪያ ግብ ሆና ተመዝግባለች፡፡

በሀላባ ኢንተርናሽናል ስታዲየም ደግሞ ቀን 10 ሰዓት ላይ መደረግ በጀመረው ጨዋታ ሀላባ ከተማ ወልዋሎ ዓዲግራት ዩኒቨርሲቲን 1 ለ 0 እየመራ ይገኛል፡፡

የሀላባ ከተማን የመሪነት ግብ ሽመክት ጉግሳ ከመረብ አሳርፏል፡፡

ተጠባቂው የማንቼስተር ሲቲ እና ሊቨርፑል ጨዋታ

ኤክስትራ ታይም ስፖርት በፋና ፖድካስት
ከደቂቃዎች በኋላ በቀጥታ ስርጭት ይጠብቁን

#ስፖርት_ፖድካስት
#ፖድካስት #ፋናፖድካስት #ፋናሚዲያኮርፖሬሽን #fanapodcast #fanadigitalmedia #fanamediacorporation #PoodkaastiiFaanaa #fanadigitalmedia فانا_عربي_بودكاست

አሰልጣኝ ፔፕ ጋርዲዮላ ኢትሃድ በመገኘት የሲቲን ጨዋታ ሊታደሙ ነው

አዲስ አበባ፣ መስከረም 27፣ 2019 (ኤፍ ኤም ሲ) ስፔናዊው አሰልጣኝ ፔፕ ጋርዲዮላ ኢትሃድ በመገኘት የማንቼስተር ሲቲን ጨዋታ ሊታደሙ ነው፡፡

አሰልጣኝ ፔፕ ጋርዲዮላ ማንቼስተር ሲቲ ከፒኤስጂ ጋር የሚያደርገውን ጨዋታ ለመታደም ኢትሃድ ስታዲየም እንደሚገኙ ተገልጿል።

ፔፕ ጋርዲዮላ ክለቡን ከለቀቁ በኋላ ለመጀመሪያ ጊዜ ወደ ማንቼስተር ሲቲ የሚመለሱ ይሆናል፡፡

ማንቼስተር ሲቲ በቀጣይ ሳምንት ረቡዕ ከፒኤስጂ ጋር የአውሮፓ ሻምፒየንስ ሊግ ጨዋታውን ያደርጋል።

የሮናልዶና የአሰልጣኝ ጆርጌ ጄሱስ ውዝግብ

አዲስ አበባ፣ መስከረም 27፣ 2019 (ኤፍ ኤም ሲ) የአምስት ጊዜ የባሎንዶር አሸናፊው ተጫዋች ክርስቲያኖ ሮናልዶ ፖርቹጋል ከዴንማርክ ጋር ከምታደርገው የኔሽንስ ሊግ ጨዋታ በፊት የብሔራዊ ቡድኑን ካምፕ ለቅቆ በመውጣት መነጋገሪያ ሆኖ ቆይቷል፡፡

ይህን ተከትሎ ከተነሳው ውዝግብ በኋላ ሮናልዶ የብሔራዊ ቡድኑ ዋና አሰልጣኝ ጆርጌ ጄሱስ የገባልኝን ቃል አፍርሷል በማለት ወቅሷል፡፡

ሮናልዶ ትናንት ምሽት በማህበራዊ የትስስር ገጹ ባሰፈረው 1 ሺህ 740 ቃላት ርዝመት ባለው ጽሁፉ ባለፈው ሳምንት በነበሩት የኔሽንስ ሊግ ጨዋታዎች አጋማሽ ላይ ቡድኑን ጥሎ በመውጣቱ የተሰማውን ጥልቅ ሀዘን ገልጿል።

ከብሔራዊ ቡድኑ ጋር የአውሮፓ ዋንጫንና የኔሸንስ ሊግን በማሸነፍ ስኬታማ ታሪክን መጻፍ የቻለው አምበል ለሀገሩ ደጋፊዎች እና ለቡድን አጋሮቹ ይቅርታ የጠየቀ ቢሆንም፣ ድርጊቱ የተቀሰቀሰው በአሰልጣኙ ምክንያት እና በጠበቀው ታማኝነት መሸርሸር መሆኑን አስምሮበታል።

ሮናልዶ ባሰፈረው ጽሁፍ መሠረት የችግሩ ዋነኛ መንስኤ ከኖርዌይ ጋር በተደረገው ጨዋታ ላይ የተፈጠሩት ሁነቶች እንደሆኑ አንስቷል።

ሮናልዶ እንደገለጸው አሰልጣኙ በጨዋታው ላይ ለ30 ደቂቃዎች ያህል እንደሚያሰልፉት አስቀድሞ ስምምነት ተደርጎ የነበረ ቢሆንም፤ አሰልጣኙ ግን ቃላቸውን ሳይጠብቁ ቀርተዋል።

https://web.facebook.com/share/p/1Epu1fLETq/

የኢትዮጵያ ሴቶች ብሔራዊ ቡድን የሩዋንዳ አቻውን አሸነፈ

አዲስ አበባ፣ መስከረም 27፣ 2019 (ኤፍ ኤም ሲ) የኢትዮጵያ ሴቶች ብሔራዊ ቡድን ከሩዋንዳ ብሔራዊ ቡድን ጋር ያደረገውን የኦሎምፒክ ማጣሪያ ጨዋታ 1 ለ 0 በሆነ ውጤት አሸንፏል።

የሉሲዎቹ ብቸኛ የማሸነፊያ ግብ ኡዛዬሴንጋ ሊድያ በራሷ መረብ ላይ አስቆጥራለች።

የሁለቱ ብሔራዊ ቡድኖች የመልስ ጨዋታ ጥቅምት 3 ቀን 2019 ዓ.ም በድሬዳዋ ስታዲየም ይደረጋል፡፡

ኢትዮጵያ ጨዋታውን በደርሶ መልስ ውጤት ካሸነፈች በቀጣይ የቦትስዋና እና ታንዛኒያን አሸናፊ የምትገጥም ይሆናል፡፡

ፔድሮ ሮድሪጌዝ ጫማውን ሰቀለ

አዲስ አበባ፣ መስከረም 27፣ 2019 (ኤፍ ኤም ሲ) ሰፔናዊው የባርሴሎና እና ቼልሲ የቀድሞ ተጫዋች ፔድሮ ሮድሪጌዝ በ39 ዓመቱ ጫማውን ሰቅሏል፡፡

ፔድሮ ለስፔን ብሔራዊ ቡድን 65 ጨዋታዎችን አድርጎ 17 ግቦችን ያስቆጠረ ሲሆን፤ በፈረንጆቹ 2010 የዓለም ዋንጫን ማንሳቱ ይታወሳል፡፡

ተጫዋቹ ከባርሴሎና ጋር የአውሮፓ ሻምፒየንስ ሊግ እና የስፔን የላሊጋን ጨምሮ የተለያዩ ዋንጫዎችን አሳክቷል፡፡

ወርቃማ የእግርኳስ ዘመኑን በባርሴሎና ያሳለፈው ፔድሮ ለክለቡ 321 ጨዋታዎችን አድርጎ 99 ጎሎችን አስቆጥሯል፡፡

ፔድሮ ከቼልሲ ጋር የእንግሊዝ ፕሪሚየር ሊግ፣ የዩሮፓ ሊግ እና የኤፍ ኤ ካፕ ዋንጫዎችን ያሳካ ሲሆን፤ ለምዕራብ ለንደኑ ክለብ 206 ጨዋታዎችን አድርጎ 43 ግቦችን ማስቆጠር ችሏል፡፡

በተጨማሪም ፔድሮ ለጣሊያን ሴሪ ኤ ክለቦች ሮማ እና ላዚዮ ተጫውቶ ማሳለፉ አይዘነጋም፡፡

ፔድሮ በአጠቃላይ በእግር ኳስ ሕይወቱ ለሀገሩ እና ለክለብ 902 ጨዋታዎችን አድርጎ 215 ግቦችን አስቆጥሯል፡፡

በሚኪያስ አየለ

አሰልጣኝ ሚኬል አርቴታ በአርሰናል ውላቸውን አራዘሙ

አዲስ አበባ፣ መስከረም 27፣ 2019 (ኤፍ ኤም ሲ) ስፔናዊው አሰልጣኝ ሚኬል አርቴታ በአርሰናል የሚያቆያቸውን አዲስ የረጅም ጊዜ ውል ተፈራርመዋል፡፡

አሰልጣኝ ሚኬል አርቴታ በአዲሱ ውላቸው መሰረት በመድፈኞቹ ቤት እስከ ፈረንጆቹ 2030 ድረስ የሚቆዩ ይሆናል፡፡

የ44 ዓመቱ አሰልጣኝ አርሰናል ከ22 ዓመታት በኋላ የሊጉን ዋንጫ እንዲያሳካ ማድረጋቸው ይታወሳል፡፡