Телеграм канал «Ulug‘bek Po‘latov»

Xalqaro tadqiqotlarning bizga nima foydasi bor?

Yuqoridagi postdan keyin, bir obunachimiz PISA, PIRLS va TALIS kabi xalqaro tadqiqotlarning bizga nima foydasi bor deb yozibdi. Bu kabi tadqiqotlarning ta’lim sifatiga ta’siri haqida ochiq manbalarda ko‘plab ma’lumotlar bor. Shuning uchun bunga to’xtalib o’tirmadim.

Bunday nufuzli tadqiqotlar albatta kerak. Lekin obunachi juda to‘g‘ri savol qo‘ygan: Aynan bizga nima foydasi bor?

Bunday xalqaro tadqiqotlarning asosiy vazifasi ta’lim tizimining qayeri kasal ekanligi, qayerida og‘riq bor-u, qanday "dori" berilsa yaxshi bo‘lib ketadi, degan tashxis qo‘yib berishdan iborat. Aniqrog‘i, biz bemor, tadqiqot o‘tkazuvchi tashkilotlar shifokor, natijalar esa bizning kasallik bo‘yicha tashxisimiz.

Ammo, ta’lim siyosatini belgilovchi shaxslar ta’lim qanday kasallik bilan og‘riyotganini shu tadqiqotlar orqali bilib olsa-yu, lekin “doktorlar” yozib bergan "dori"larni qabul qilmasa, rostdan ham bu tadqiqotlarning foydasi bo‘lmaydi.

Lekin, xalqaro tadqiqot natijalarini hech kim bilan bo‘lishmaydigan, hisobotlarini ham e’lon qilmay, kichik post bilan cheklanadigan, hatto qayerga qarab ketayotganimiz haqida kichik bir matbuot anjumani ham tashkil qilmaydigan ta’limga mas’ul vazirlikdan hozircha hech nima kutmayapman.

Endi bunday nufuzli xalqaro tadqiqotlarning bizga foydasi bor yoki yo‘qligini o‘zingiz chamalab olavering.

@u_pulatoff

PIRLS 2026 tadqiqotining sinov jarayonlariga start berilibdi

Bugundan PIRLS 2026 tadqiqotining sinov jarayonlari boshlandi. O‘zbekiston PIRLS tadqiqotida ikkinchi marotaba ishtirok etyapti. Avvalgi tadqiqotda O‘zbekiston 57 davlat orasida o‘rtacha balldan ham pastroq natijani qayd etib, 49-o‘rinni egallagandi.

Nima bo‘lgan taqdirda ham, bu jarayondagi eng muhim narsa — tadqiqot natijalaridan to‘g‘ri xulosa chiqarib, xato qilishni to'xtatish.

Masalan, o‘qituvchilar ovozini eshitib, ta’limdagi haqiqiy muammolarimizni aniqlash uchun 2024-yilda TALIS tadqiqotida ham qatnashganmiz. O‘zbekistonda xuddi shu tadqiqotning tajriba sinovi ilk bor 2021-yilda o‘tkazilgandi.

Ammo, uning natijalaridan kelib chiqib, jo‘yaliroq qadam tashlanganini hali ko‘rmadim. Shu bilan birga, biror bir hujjatda xalqaro tadqiqot natijalari tilga olinib, aynan shu natijalardan kelib chiqib qaror qabul qilinganiga ham guvoh bo‘lmadim. Yoki men ko‘rmay qoldimmi?

Ko‘ramiz, "ikkinchi ma’muriyat" bu borada qanday yo‘l tutar ekan...? Hisobotlarni-ku, e’lon qilishlariga ishonmay qo‘yganman. Hech bo‘lmasa, natijalar bo‘yicha matbuot anjumani tashkillashadi, degan umiddaman.

@u_pulatoff

Xotirjamlik

Ha, xotirjamlik hukm surmoqda…

@u_pulatoff

Shaxnoza opa qonunchilikka “siyosiy ekstremizm” tushunchasi kiritilayotgani haqida ham gapiring, iltimos.

Agar bu qonunni o’sha deputatlarimiz silliq qilib, ma’qullab berishsa, ayrim jamoatchilik faollarini ham ertaga siyosiy ekstremizmchilar — “yomonlar” qatorida sanab yurmaylik.

@u_pulatoff

Menga qolsa rektorlarni ham saylagan bo'lardim

Prezidentning 2026-yil 10-apreldagi PF–58-son Farmoni bilan Oliy ta'lim, fan va innovatsiyalar vazirligiga bir qancha vakolatlar berilyapti. Shulardan biri rektorlarni tayinlash tizimidagi o'zgarish.

Endilikda, vazirlik davlat oliygohlarining rektorini Prezident Administratsiyasi va Vazirlar Mahkamasi bilan kelishgan holda lavozimga tayinlashi hamda lavozimidan ozod etish mumkin bo'ladi.

Menga qolsa, rektorlarni ham saylash kerak, degan bo'lardim. Rektorlar oliygohni rivojlantirish dasturini ishlab chiqsin, pedagog va talabalar uni muhokama qilsin, keyin ular o'zi munosib deb topgan rektoriga ovoz bersin.

Rektor saylovlari debat va sog'lom bahslar bilan o'tsa, rektorlikka nomzodlar o'zing dasturini himoya qilib chiqishlar qilsa, bu qanday yaxshi. (Faqat partiyalar sayloviga o'xshab qolmasligi shart!)

Mana shu yo'l orqali yoshlarda saylov madaniyatini shakllantirsak bo'ladi, shunda rektorlarning ham mas'uliyati oshadi. Ular o'zini vazirlik oldida emas, qo'l ostida ishlaydigan pedagog va talabalar oldida hisobdor deb biladi.

Shunda ular mantiqli qaror qabul qila boshlaydi. Forma, kalta paypoq emas, aslida ta'lim sifati eng muhimi ekanligini anglab yeta boshlaydi.

@u_pulatoff

Maktabgacha va maktab taʼlimi vazirligi ochiqlik indeksida yuqori natija olibdi

Ya'ni, 2025-yilni matbuot anjumanisiz yakunlagan, o'zi imzolagan normativ-huquqiy hujjatlarni rasmiy saytiga deyarli yuklamaydigan vazirlik ochiqlik indeksida yuqori o'rinni qayd etibdi.

Qichimagan joyni qashlashdi-da, endi o'zim bu ochiqlik indeksi haqida maqola yozib, yaxshilab tahlil qilib ko'raman shekilli.

@u_pulatoff

Ozroq lirik chekinish

Stromae’ning “Papaoutai” nomli qo‘shig‘ini juda ham ko‘p eshitganmiz. (Videoni ko‘rsangiz qo‘shiq albatta yodingizga tushadi.)

Bu qo‘shiqdan odatda ko‘ngilochar kontentlar uchun foydalanishadi. Videolarda, musiqa fonida, diskotekalarda ham shu qo‘shiqqa ko‘p o‘ynashadi.

Lekin u aslida juda ham og‘riqli, g‘amgin qo‘shiq ekan. Qo‘shiq ma’nosi esa o‘ta ta’sirli.

Stromae’ning fransuzcha qo‘shig‘i “Papa, où t’es?”, ya’ni “Dada, qayerdasan?” deb nomlanadi. Qo‘shiq otasiz ulg‘aygan bola tomonidan aytiladi.

Qo‘shiqqa ishlangan klipda bola otasini yo‘qotgan, lekin nega yo‘qligini tushunmaydi. Barmoqlarim bilan ming marta sanasam ham otam kelmadi, deb nido qiladi.

Qo‘shiq davomida bola "Dada, qayerdasan?" deb tinimsiz savollar beradi, ammo hech kim javob bermaydi.

Klipdagi bolakay garchi uning otasi yo‘q bo‘lsa-da, harakatsiz, qo‘g‘irchoq "otaga" qarab, turli xil harakatlar qiladi. Go‘yoki, otasiga o‘zini ko‘rsatib qo‘ymoqchidek. (bolalarcha)

Bu qo‘shiq Stromae’ning hayoti bilan ham bog‘liq. Chunki u otasiz ulg‘aygan, juda ko‘p qiyinchiliklarni boshidan o‘tkazgan. Uning otasi 1994-yilgi Ruanda genotsidi paytida halok bo‘lgan.

Xullas, bu qo‘shiqni va shu qo‘shiq uchun ishlangan klipni tushunib tomosha qilsangiz, juda ham ta’sirlanib ketasiz.

@u_pulatoff