Чидолмайман сизга тегса дард,
Сира хаста бўлманг Онажон.
Менинг учун сиз ҳаммадан мард,
Кексаликка кўнманг Онажон.

Кулиб турсин кўзлар қароқлар,
Қизил бўлсин юзлар яноқлар,
Тушмасин ҳеч сочизга оқлар,
Кексаликка кўнманг Онажон.

Даврон сурсам бўлиб ёнимда,
Оймомодек тўлиб ёнимда,
Доим туринг, кулиб ёнимда,
Кексаликка кўнманг Онажон.

Ёшингизга ёш қўшилса ҳам,
Мағрур туринг, сира чекманг ғам,
Вақтга ҳам, бир қилсин алам,
Кексаликка кўнманг Онажон.

Қуёш бўлинг бошимда порлаб,
Қайда бўлмай турингиз чорлар,
Ўзингизни қўймангиз хорлаб,
Кексаликка кўнманг Онажон.

Қўлингизда қадоқларингиз,
Сўз демайди дудоқларингиз,
Эшитябман дил оҳларингиз,
Кексаликка кўнманг Онажон.

Сўрасалар бахт бу нима деб,
Айтар эдим бахт бу Она деб,
Қаримайман асло, сира деб,
Кексаликка кўнманг Онажон.

Ҳаёт экан чекдингиз ситам,
Гоҳ кулдингиз, гоҳ қароқда нам,
Мен миллион йил яшай деб, болам,
Кексаликка кўнманг Онажон.