اذا المسيحي يكلك هذا عيد الشيطان، يجي المسلم الدوني الماعنده احترام لثفافته الاسلامية يحشر روحه بنصهم..

الدين ام الوطن؟ لابد ان نفكك هذا السؤال لان يتضمن مغالطة قد مو واضحة للكل, لكن من تشوف اي سؤال صار معضلة لفترة طويلة وتشوف اكو صعوبة بالجواب عليه (لو وطني وكافر لو خائن ومؤمن) اعرف اكو مغالطة بالسؤال, ويحتاج تفكيك.. بداية , السؤال نفسه بي مشكلة, ما ممكن تخيرني بين شيئين مختلفين تماما عن بعضهم ومو متضادين, ليش مو اثنينهم مثلا كخيار ثالث؟ نعم لو كلتلي في حال تزاحم الدين مع الوطن منو تختار..؟ اذن خلي نصيغ السؤال بطريقة اوضح : هل تقدم الهوية الوطنية على الهوية الدينية او العكس..؟ خصوصا في التزاحمات الو الازمات.. طبعا الانسان من الطبيعي ان يحمل اكثر من هوية, مثلما تفتح محفظتك الشخصية وتشوف عندك هوية وطنية , وهوية جامعة , وهوية وظيفة , الخ.. وماكو تداخل بينهم اذا فعلا اكو تفاهم بين عائدية هاي الهويات.. المشكلة الحقيقية ما تكمن بمفهوم الدين, بل الوطن... موقف ديننا وطائفتنا واضحة فيما يخص الوطن او البلد الذي يسكن فيه الناس, القران الكريم وسيرة النبي واهل بيته مليئة بالمواقف الي تحث على اعمار البلد والدفاع عن اهله.. اما مفهوم الوطن ولوازمه وعلاقته بالدين , ودور الحكومات في تشكيل مفهوم الوطن , فهذا بي اختلاف كبير جدا, ونظريات متعددة, غربية وشرقية, قديمة وحديثة, صحيحة وخاطئة.. فاذا تحجيلي عن تعارض الوطن بالمفهوم "العلماني" اكيد يتعارض مع الدين بهواي مواقف.. والامثلة اكثر من ان تحصى, من انت مواطن موظف او منتسب عسكري ويجيك امر حكومي ملزم يتضمن مخالفة شرعية, ويكلك هذا واجبك الوطني ان تنفذه والا انت خائن للوطن..!! اما الوطن بالمفهوم الديني فما يتعارض ابدا مع ديننا, قال تعالى ((أُذِنَ لِلَّذِينَ يُقَاتَلُونَ بِأَنَّهُمْ ظُلِمُوا ۚ وَإِنَّ اللَّهَ عَلَى نَصْرِهِمْ لَقَدِيرٌ * الَّذِينَ أُخْرِجُوا مِنْ دِيَارِهِمْ بِغَيْرِ حَقٍّ إِلَّا أَنْ يَقُولُوا رَبُّنَا اللَّهُ)) قال تعالى: (( يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا)) لكن بما انه الاعلام قائم على استخدام الأسئلة المفخخة لإثارة الجدل , وتحويل الأسئلة المشروعة الى مصيدة لاحراج الضيف, ولا تأخذ بالتفكيك الموضوعي للاسئلة, فلا بأس بالاجوبة التي تسكت السائل وتوصل رسالة حق, كمثل جواب: عندما كان الوطن ع وشك السقوط بيد الساقطين أنقذته العقيدة..! وجهة نظر..