Телеграм канал «Новы свет 🌞»

#верш
#Максім_Крывіч

Мілая Дзі

Уночы, калі прачынаюцца зоры,
Калі я не побач — у неба глядзі.
Ці бачыш там Месяц у цëмнай прасторы?
У ім мяне знойдзеш ты, мілая Дзі.

Я буду у ценях, у гуках прыроды:
Па іх, як па следзе, упарта ідзі.
Дзе чутны гуллівыя дзвінскія воды —
Я там адшукаюся, мілая Дзі.

Дзе шэргат старонак заглушыць размову,
Ты з тысячы слоў адно слова складзі.
Пачуеш там голас яго перазвонаў —
Я там усміхаюся, мілая Дзі.

Куды б я не трапіў — я буду з табою.
Калі засумуеш — то проста знайдзі:
У шчырым каханні, у цёплай любові —
Я буду з табой, мая мілая Дзі.

21.08.2026

─────────≪✷≫────────
Спасылкі аўтара:
● дом месяца (Telegram)
● Maksim Kryvich (Threads)
─────────≪✷≫────────

Надрукавана паводле матэрыялаў, прапанаваных аўтарам.
☀️ Прапанаваць свае творы/малюнкі/музыку/вырабы можна ў паведамленні канала або рэдактару (@m_kryvich) ў асабістыя паведамленні!

#верш
#Мікалай_Трасянка

Сон

Я ноччу бачыў дзіўны сон:
Там дзесьці дробны дождж ішоў,
Але не трэ мне парасон —
Сваё я шчасце ў ім знайшоў.

Я насамрэч пабыў дзіцем.
Мне то было, як сэнс жыцця —
Не адчуваў ніколі днём
Такога шчасця, мабыць, я.

Я ранкам бачыў дзіўны сон:
Ужо дождж знік — вясёлка там.
Пачуўся мне вясёлы звон —
То птушкі льюцца клёкатам.

Цягнецца так мой сон далей,
Ён захапіў мяне ў палон,
Мне цалкам робіць свет цяплей!
На жаль, то толькі добры сон.

─────────≪✷≫────────
Спасылкі аўтара:
● Нататнік Мікалая Трасянкі (Telegram)
─────────≪✷≫────────

Надрукавана паводле матэрыялаў, прапанаваных аўтарам.

☀️ Прапанаваць свае творы/малюнкі/музыку/вырабы можна ў паведамленні канала або рэдактару (@m_kryvich) ў асабістыя паведамленні!

#ADM

Паважаныя творцы і шаноўныя аматары творчасці!
У паведамленнях канала вельмі шмат пытанняў наконт таго, куды падзеліся допісы і чаму запрапанаваныя творы разглядаюцца так доўга.

Мне хочацца быць з вамі шчырым, таму казаць буду проста: я перагарэў. Летась я ўпаў у маркоту, якая доўжылася нашмат даўжэй, ніж раней. Цяпер жа я трапіў у цяжкую фінансавую (і не толькі) сітуацыю, калі ад мяне і маіх дзеянняў залежыць жыццё не толькі маё, але і блізкага чалавека. Гэты цяжар жрэ мяне, і мне часта не хапае ні часу, ні моцы, каб рэгулярна, як тое было раней, ладзіць публікацыі і шукаць творчасць у сацсетках і па-за імі.

Я абяцаю, што канал не будзе кінуты, і вы час ад часу будзеце бачыць на ім новыя творы. Бо я, нягледзячы ні на што, люблю беларускую творчасць, творцаў і вас, мае паважаныя падпішчыкі. Спадзяюся, што у хуткім часе ўсё палепшыцца, і я змагу вярнуцца да вас.

З павагай, Максім Крывіч, галоўны рэдактар

#верш
#Мацей_Мілашэвіч

Мэлянхолія

Плакаў ветах у люстры паўсонна-ярынным,
Пелі гарфы працягла над зэшлай зямлёй,
Дзе лунаў смутных вобразаў прывідны рой,
Дзе застыў млява ґеній сярэбранакрылы.

Жрэц крыштальнай красы, ён шукаў сьветлых мар —
Адамантам агністае рэзала сэрца.
Дзень забыў пра жыцьцё, ноч ня ведала сьмерці —
Разьлятаўся ў аскепкі таемны алтар.

Ды напоўніцца звонам этэр цемнатвары,
Паспадаюць вярыгі зь лятункаў і яў
І рассыплюцца коснасьці друзлыя чары.

Ён, нясьмела ступаючы, ўбачыць нарцысы,
І да персяў натхнёных аддана прыцісьне,
І, зірнуўшы ў нябёсы, ён скажа: "Се Я!"

─────────≪✷≫────────
Спасылкі аўтара:
● Purpur jašče ŭvaskreśnie (Telegram)
● Мацей Мілашэвіч (Stihi.by)
─────────≪✷≫────────

Надрукавана паводле матэрыялаў, прапанаваных аўтарам.

☀️ Прапанаваць свае творы/малюнкі/музыку/вырабы можна ў паведамленні канала або рэдактару (@m_kryvich) ў асабістыя паведамленні!