Телеграм канал «Ibrohim Abdurahmonov»

#2026_World_Food_Prize_Dialogue

Day Two moments of the 2026 Norman E. Borlaug International Dialogue!

O‘zbekiston va ICRISAT urug‘chilik sohasidagi hamkorlikni kengaytiradi

🇺🇿 O‘zbekiston Respublikasi qishloq xo‘jaligi vaziri Ibrohim Abdurahmonov AQShga ishchi tashrifi doirasida Yarim qurg‘oqchil tropiklar uchun xalqaro qishloq xo‘jaligi tadqiqotlari instituti (ICRISAT) vakili Manzur Dar boshchiligidagi mutaxassislar bilan uchrashdi.

🌍 Muloqotda urug‘chilik sohasidagi ilmiy hamkorlikni kengaytirish, mutaxassislar o‘rtasida muzokaralar tashkil etish va istiqbolli hamkorlik yo‘nalishlarini belgilash masalalari muhokama qilindi.

✍️ Uchrashuv yakunida kutilayotgan oliy darajadagi tadbirlar doirasida ikki tomonlama hamkorlik hujjatini imzolash bo‘yicha kelishuvga erishildi.

🌾 Bugungi kunda iqlim o‘zgarishi, suv resurslari taqchilligi va qishloq xo‘jaligi mahsulotlariga talabning ortishi sharoitida yuqori hosildor, tashqi muhit ta’sirlariga chidamli ekin navlarini yaratish muhim ahamiyat kasb etmoqda. Bu borada xalqaro ilmiy markazlar bilan hamkorlik qilish, zamonaviy seleksiya usullarini o‘zlashtirish va mutaxassislar salohiyatini oshirish agrar sohaning barqaror rivojlanishiga xizmat qiladi.

🔬 ICRISAT bilan hamkorlikni rivojlantirish O‘zbekistonda urug‘chilik sohasidagi ilmiy tadqiqotlarni takomillashtirish, ilg‘or tajribalarni joriy etish va qishloq xo‘jaligining iqlim o‘zgarishiga moslashuvchanligini oshirish uchun yangi imkoniyatlar yaratishi mumkin.

🇺🇸 Vazir Ibrohim Abdurahmonovning AQShga ishchi tashrifi davom etmoqda.

🌐Website 💬Telegram 💬Facebook 📺YouTube 📷Instagram

Bug‘doy seleksiyasida yangi imkoniyatlar: O‘zbekiston va CIMMYT hamkorlikni kengaytiradi

📌 AQShda bo‘lib turgan O‘zbekiston Respublikasi qishloq xo‘jaligi vaziri Ibrohim Abdurahmonov Xalqaro makkajo‘xori va bug‘doy seleksiyasi markazi (CIMMYT) bosh direktori Brem Govards bilan uchrashdi. Muloqotda g‘allachilikni modernizatsiya qilish, ilg‘or seleksiya texnologiyalarini joriy etish va mutaxassislar malakasini oshirish masalalari muhokama qilindi.

🌍 Vazir O‘zbekiston bilan hamkorlik uchun CIMMYT rahbariyatiga minnatdorlik bildirdi. Brem Govards esa mamlakatimiz jadal rivojlanayotganini ta’kidlab, bu o‘zgarishlarga shaxsan guvoh bo‘lganini qayd etdi.

🔬 Ayni paytda CIMMYT bilan hamkorlikda Janubiy dehqonchilik ilmiy-tadqiqot institutining ilmiy salohiyatini rivojlantirish va moddiy-texnik bazasini mustahkamlash bo‘yicha ishlar olib borilmoqda.

🌱 Hamkorlikning muhim yo‘nalishlaridan biri — “Speed Breeding” texnologiyasi orqali bug‘doyning yangi navini yaratish muddatini 12–15 yildan 4–5 yilgacha qisqartirish hisoblanadi. Shuningdek, o‘zbekistonlik olim va mutaxassislar uchun CIMMYTning Meksikadagi bosh ofisi va Turkiyadagi markazida malaka oshirish dasturlari tashkil etilgan.

🌾 Uchrashuvda vazir mamlakatimizda bug‘doy ekish muddatlarini qayta ko‘rib chiqish va urug‘larni yarovizatsiya qilish kabi agrotexnologik yondashuvlar qo‘llanilayotganini ta’kidladi.

🤝 Uchrashuv yakunida tomonlar hamkorlikni yanada kengaytirish, tajriba almashish va mahalliy mutaxassislar uchun o‘quv-treninglar tashkil etish bo‘yicha kelishib oldilar.

🌐Website 💬Telegram 💬Facebook 📺YouTube 📷Instagram

O‘zbekiston va The Rockefeller Foundation hamkorlik istiqbollarini muhokama qildi

🌱 O‘zbekiston Respublikasi qishloq xo‘jaligi vaziri Ibrohim Abdurahmonov AQShga ishchi tashrifi doirasida The Rockefeller Foundation prezidenti Rajiv Shah bilan uchrashdi.

🌍 Muloqotda O‘zbekiston va Markaziy Osiyo mamlakatlari bilan hamkorlikni kengaytirish istiqbollari muhokama qilindi. Rajiv Shah O‘zbekiston haqida ko‘plab ijobiy fikrlar eshitayotganini ta’kidlab, mintaqa davlatlari bilan hamkorlikni rivojlantirishga qiziqish mavjudligini qayd etdi.

⏳ Uchrashuvda oziq-ovqat xavfsizligini ta’minlash, iqlim o‘zgarishi oqibatlarini yumshatish, tabiiy resurslardan samarali foydalanish hamda qishloq xo‘jaligiga innovatsion yechimlarni joriy etish kabi yo‘nalishlarda hamkorlik imkoniyatlarini o‘rganishga alohida e’tibor qaratildi.

🔗 Tomonlar o‘rtasidagi muloqot O‘zbekistonning agrar sohadagi xalqaro aloqalarini kengaytirish va istiqbolli tashabbuslarni rivojlantirish uchun muhim ahamiyat kasb etadi. Uchrashuv yakunida Ibrohim Abdurahmonov hamkorlik imkoniyatlarini atroflicha muhokama qilish maqsadida Rajiv Shahni O‘zbekistonga taklif qildi.

🏛️ The Rockefeller Foundation 1913-yilda Jon Rokfeller tomonidan tashkil etilgan xalqaro xayriya jamg‘armasi bo‘lib, sog‘liqni saqlash, oziq-ovqat tizimlari, energetika va innovatsion moliyalashtirish yo‘nalishlarida faoliyat yuritadi. Rajiv Shah 2017-yildan buyon jamg‘arma prezidenti sifatida faoliyat olib bormoqda.

🌐Website 💬Telegram 💬Facebook 📺YouTube 📷Instagram

O‘zbekiston qishloq xo‘jaligidagi islohotlar xalqaro maydonda e’tirof etildi

🏆 AQShning Ayova shtati De-Moyn shahrida «Top Agri-food Pioneers» (TAP) xalqaro mukofoti g‘oliblarini taqdirlash marosimi bo‘lib o‘tdi. Mukofot oziq-ovqat xavfsizligini ta’minlash va agrar sohani rivojlantirishga munosib hissa qo‘shayotgan tashabbuskorlarni e’tirof etishga qaratilgan.

🌍 Quvonarlisi, 2026-yilgi mukofot laureatlari qatoridan O‘zbekiston Respublikasi qishloq xo‘jaligi vaziri Ibrohim Abdurahmonov ham joy oldi.

🤝 «World Food Prize Foundation» tomonidan taqdim etiladigan ushbu mukofot oziq-ovqat xavfsizligi sohasidagi dolzarb muammolarga innovatsion yechimlar taklif etayotgan olimlar, siyosatchilar, jamoat tashkilotlari vakillari va novatorlarning faoliyatini e’tirof etadi. Bu yil 30 ta mamlakatdan 40 nafar vakil mukofotga sazovor bo‘ldi.

✅ Mazkur e’tirof O‘zbekistonda qishloq xo‘jaligini modernizatsiya qilish, oziq-ovqat xavfsizligini mustahkamlash va agrar tarmoqni barqaror rivojlantirish borasida amalga oshirilayotgan islohotlarning xalqaro miqyosdagi ahamiyatini namoyon etadi.

💧 So‘nggi yillarda mamlakatimizda yer va suv resurslaridan oqilona foydalanish, suv tejovchi texnologiyalarni joriy etish, ilm-fan va innovatsiyalarni rivojlantirish, shuningdek, ishlab chiqarish samaradorligi va eksport salohiyatini oshirishga alohida e’tibor qaratilmoqda.

⛅️ Iqlim o‘zgarishi, suv taqchilligi va oziq-ovqatga bo‘lgan talabning ortib borishi agrar sohada innovatsion yondashuvlar va xalqaro hamkorlikni yanada kuchaytirishni taqozo etmoqda.

📰 Shu jihatdan, O‘zbekistonning agrar sohadagi islohotlari va tashabbuslarining xalqaro maydonda e’tirof etilishi mamlakatimizning global oziq-ovqat xavfsizligini ta’minlashga qo‘shayotgan hissasi e’tirofidir.

🌐Website 💬Telegram 💬Facebook 📺YouTube 📷Instagram

Ocharchilikka qarshi kurashda ilm-fan va xalqaro hamkorlik muhim

🌍 Ayni kunlarda AQShda bo‘lib turgan O‘zbekiston Respublikasi qishloq xo‘jaligi vaziri Ibrohim Abdurahmonov Ayova shtatining De-Moyn shahrida «Ochlik g‘alaba qozonishidan avval» shiori ostida o‘tkazilayotgan Norman Borloug nomidagi xalqaro muloqot simpoziumi ochilish marosimida ishtirok etdi.

🌾 Simpoziumda global oziq-ovqat xavfsizligini ta’minlash, ocharchilikka qarshi kurashish va barqaror oziq-ovqat tizimlarini shakllantirishda ilmiy izlanishlar, innovatsion texnologiyalar hamda xalqaro hamkorlikning o‘rni alohida ta’kidlandi.

🔬 Bugungi kunda iqlim o‘zgarishi, aholi sonining ortishi va tabiiy resurslar cheklangani qishloq xo‘jaligida yangi yechimlarni joriy etishni talab qilmoqda.

🔗 Shu bois ilm-fan yutuqlaridan samarali foydalanish, ilg‘or tajribalarni ommalashtirish va davlatlar o‘rtasidagi hamkorlikni mustahkamlash dolzarb ahamiyat kasb etmoqda.

🤝 O‘zbekistonning ushbu xalqaro muloqotdagi ishtiroki milliy agrar tajribani xalqaro miqyosda namoyish etish, ilg‘or tashabbuslarni o‘rganish va global oziq-ovqat xavfsizligiga qaratilgan sa’y-harakatlarni birlashtirish uchun muhim imkoniyatdir.

🌐Website 💬Telegram 💬Facebook 📺YouTube 📷Instagram

Prezidentimiz G‘uzorda paxta hosilini ko‘zdan kechirdi.
—
Президент нашей страны осмотрел урожай хлопчатника в Гузаре.

Prezident.uz|Facebook|Instagram|YouTube|X