⚡️ Давлат эҳтиёжлари учун ер участкалари олиб қўйилган шахсларга вилоят ҳокимлиги томонидан маблағ ажратиб берилади

Оҳангарон шаҳри, Қибрай, Юқори Чирчиқ ва Пискент туманларида давлат ва жамоат эҳтиёжлари учун жисмоний ва юридик шахсларнинг ер участкалари олиб қўйилган эди.

Шу муносабат билан етказилган зарарларни қоплаш учун вилоят ҳокимлиги ҳузуридаги "Давлат ва жамоат эҳтиёжлари учун ер участкаларининг олиб қўйилиши муносабати билан фуқароларга ва юридик шахсларга етказилган зарарларни қоплаш бўйича марказлаштирилган ҳудудий жамғарма" маблағлари ҳисобидан жами 25 млрд. 926 млн. сўм маблағ ажратилмоқда.

Шундан, Оҳангарон шаҳар ҳокимлигига - 635 млн. сўм, Қибрай тумани ҳокимлигига -25 млрд. сўм, Юқори Чирчиқ тумани ҳокимлигига - 238 млн. сўм ҳамда Пискент тумани ҳокимлигига 53 млн. сўм маблағ ажратилиши кўзда тутилган.

Мазкур маблағларнинг мақсадли сарфланишига вилоят Давлат молиявий назорати бошқармаси бошлиғи А.Тожимуродов ҳамда Оҳангарон шаҳри, Қибрай, Юқори Чирчиқ ва Пискент туманлари ҳокимлари масъул этиб белгиланган.

Бу ҳақда вилоят ҳокими Р.Холматов жорий йил 26 августда №375-сонли қарорни имзолади.

@hokimiyat_hujjatlari

⚡️ Юқори Чирчиқ туманидаги 4 гектар ер майдони иссиқхона комплекси қурилишига ажратилди

"BIOSELL" МЧЖ қўшма корхонасига капитал қурилиш қурмаслик шарти билан замонавий енгил конструкцияли иссиқхона комплекслари ташкил этиш учун Юқори Чирчиқ туманидаги 4,0 гектар суғориладиган ер майдони ажратилди.

Туманнинг "Гулбоғ" маҳалла фуқаролар йиғини ҳудудидаги ушбу ер майдони 49 йил муддатга ажратилиши белгиланган.

Юқори Чирчиқ тумани ҳокимининг бу ҳақдаги №2374-сонли қарори Тошкент вилояти ҳокими томонидан жорий йил 25 августда №373-сонли қарори билан тасдиқлаб берилди.

Айтиш жоизки, ажратилган ер майдони бир йил давомида ўзлаштирилмаса, мазкур қарор ўз кучини йўқотади.

@hokimiyat_hujjatlari

⚡️ Тошкент вилояти шаҳар, туманларида ихтисослаштирилган мактаблар ташкил этилади

Президентимизнинг жорий йил 7 майдаги ПҚ-4708-сонли қарорига ижроси бўйича 2020-2023 йиллар мобайнида вилоятимиз шаҳар, туманларида математика фанини чуқурлаштириб ўқитишга ихтисослаштирилган жами 22 та мактаблар ташкил этилади.

Жумладан,

👉 2020 йил 4 та - Нурафшон шаҳри (4-мактаб),
Чирчиқ шаҳри (15-мактаб),
Қибрай тумани (6-мактаб)
Оққўрғон тумани(11-мактаб);

👉 2021 йил 4 та - Олмалиқ шаҳри (19-мактаб),
Янгийўл шаҳри (1-мактаб),
Зангиота тумани (15-мактаб),
Янгийўл тумани (27-мактаб);

👉 2022 йил 6 та - Бекобод шаҳри (17-мактаб),
Бекобод тумани (46-мактаб),
Паркент тумани (27-мактаб),
Ўрта Чирчиқ тумани (54-мактаб),
Тошкент тумани (6-мактаб),
Юқори Чирчиқ тумани (9-мактаб);

👉 2023 йил 8 та - Ангрен шаҳри (33-мактаб),
Оҳангарон шаҳри (3-мактаб),
Бўка тумани (2-мактаб),
Бўстонлиқ тумани (54-мактаб),
Қуйи Чирчиқ тумани (31-мактаб),
Оҳангарон тумани (1-мактаб),
Пискент тумани (42-мактаб)
Чиноз туманидаги 40-мактаб математика фанига ихтисослаштирилиб, янгидан ташкиллаштирилади.

Бу ҳақда вилоят ҳокими Р.Холматов жорий йил 24 август куни №371-сонли қарорни имзолади.

@hokimiyat_hujjatlari

⚡️ Бўстонлиқ туманидаги ўзлаштирилмаган 62,5 гектар ер майдони давлат захирасига қайтариб олинди

Тошкент вилояти ҳокимининг 2018 йил 11 майдаги №346-сонли қарори ўз кучини йўқотиб, жорий йил 12 августда ушбу қарор билан боғлиқ №344-сонли қарор имзоланди.

Яъни, Бўстонлиқ тумани, "Чимган" маҳалласи ҳудудидаги "Rake-Nur" МЧЖга 2 йил аввал соғломлаштириш комплекси қурилиши учун ажратилган 62,5 гектар ер майдони шу кунга қадар ўзлаштирилмаганлиги сабабли, туман давлат захирасига қайтариб олинди.

@hokimiyat_hujjatlari

⚡️Вилоят йўналишларида йўловчи ташишни ташкил этиш вилоят комиссияси таркиби ўзгарди

✍️ Бугунги кунда аксариятимиз кунига камида икки марта маршрут таксилари хизматидан фойдаланамиз. Демак, айтиш мумкинки, уларнинг бизга сифатли хизмат кўрсатиши, белгиланган тартиблар асосида фаолият юритиши жуда муҳим.

Ҳеч ўйлаб кўрганмисиз, линияли маршрут таксилари фаолиятини кимлар, қайси мансабдор шахслар белгилайди?
3 миллионга яқин аҳолиси мавжуд вилоятимизнинг йўловчи ташувчи транспорт фаолияти қуйида келтириб ўтилган комиссия аъзолари, яъни 9 нафар мансабдор шахсга бевосита боғлиқ.

▶️ Жорий йил 12 августдан бошлаб, вилоят ҳокимининг №345-сонли қарорига асосан, "Шаҳар, шаҳар атрофи ва шаҳарлараро (вилоят ичида) йўналишларда йўловчилар ташишни ташкил этиш вилоят комиссияси" таркибига ўзгартириш киритилди.

Унга кўра комиссия қуйидаги таркибда шакллантирилди:

1. Ш.Ҳакимов - Тошкент вилояти ҳокимининг капитал қурилиш ва коммуникациялар масалалари бўйича ўринбосари, комиссия раиси.

2. С.Шоқосимов - Ўзбекистон Республикаси Транспорт вазирлиги вилоят транспорт бошқармаси бошлиғи, комиссия раиси ўринбосари.

КОМИССИЯ АЪЗОЛАРИ:

3. Р.Раимов - вилоят Давлат солиқ бошқармаси бошлиғи.

4. А.Мухаммадиев - вилоят Адлия бошқармаси бошлиғи.

5. Б.Нигманов - Вилоят ИИББ ЙҲХБ бошлиғи.

6. Ж.Исмоилов - Ўзбекистон Республикаси Монополияга қарши курашиш қўмитасининг вилоят ҳудудий бошқармаси бошлиғи.

7. З.Турсунов - Вилоят ҳокимлиги молия бош бошқармаси в.в.б.

8. У.Акбаров - Савдо-саноат палатасининг вилоят бошқармаси бошлиғи.

КОМИССИЯ КОТИБИ:

9. Х.Бабаджанов - Ўзбекистон Республикаси Транспорт вазирлиги Тошкент вилояти транспорт бошқармаси "Таърифларни шакллантириш ва тендерларни ўтказиш" сектори бошлиғи.

▶️ Айтиш жоизки, ушбу комиссия аъзолари бошқа ишга ўтиши ёки ишдан кетиши муносабати билан уларнинг ўрнига тайинланган ёки вазифаси юклатилган мансабдор шахслар комиссия аъзоси ҳисобланади.

Комиссия аъзоси комиссия ишида иштирок эта олмаган тақдирда, унинг ўрнига тегишли ишончнома орқали унинг вакили қатнашиши мумкин.

@hokimiyat_hujjatlari

⚡️ Қуйи Чирчиқ туманида 2020-2023 йилларда янги замонавий энергия тежамкор нимстанция ҳамда ҳаво электр узатиш тармоқлари қурилади

Президент Ш.Мирзиёевнинг "Тошкент ва Тошкент вилоятида электр энергияси таъминоти барқарорлигини янада ошириш чора-тадбирлари тўғриси"даги ПҚ-4791-сонли қарорининг ижроси юзасидан Тошкент вилоятида ҳам муҳим чора-тадбирлар бошлаб юборилган.

Жумладан, Қуйи Чирчиқ туманида янги 500 кВ кучланишли "Ҳалқа" электр нимстанцияси ҳамда 220 кВ ва 500 кВ кучланишли ҳаво электр узатиш тармоқлари қурилиши бўйича жорий йил 7 августда вилоят ҳокимининг №337-сонли қарори қабул қилинди.

Лойиҳани молиялаштириш бўйича Жаҳон банки билан дастлабки келишувга эришилди. Лойиҳани амалга ошириш доирасида қуввати 1 400 МВА бўлган 500/220/10 кВ кучланишли, йиллик электр энергиясини тақсимловчи замонавий энергия тежамкор нимстанция ва умумий узунлиги 410 км, жумладан, 322 км узунликдаги 220 кВ ва 88 км узунликдаги 500 кВ кучланишли электр узатиш тармоқлари қурилади.

Мазкур қурилиш ишлари учун Қуйи Чирчиқ тумани "Пахтазор" МФЙ ҳудудидан доимий фойдаланиш учун ер майдони ажратилиши белгиланган.

Электр энергетика объектларини қуришда ер участкалари эгалари, фойдаланувчилар ва ижарачиларнинг кўрган зарарлари "Ўзбекистон миллий электр тармоқлари" АЖ маблағлари ҳисобидан қопланади.

@hokimiyat_hujjatlari

⚡️ Маҳалла раиси ўз ҳудудида уй шароитида коронавирус билан даволанаётган беморларга вақтида ва тўғри тиббий ёрдам кўрсатилишини ташкил этиш учун масъуллиги белгиланди

Бугунги кунда Тошкент вилоятининг 22 та шаҳар-туманларида жами 3 063 513 нафар аҳоли истиқомат қилиб келмоқда.

Вилоят миқёсида

✳️ маҳаллар сони - 1042 та
✳️ оилалар сони - 812 732 нафар
✳️ хонадонлар сони - 634 061 та
✳️ кам таъминланган оилалар - 40 474 нафар
✳️ боқувчисини йўқотганлар - 14 613 нафар
✳️ ногиронлар - 36 275 нафар
✳️ камбағаллар - 7 537 нафарни ташкил этади.

Жорий йилнинг 4 август ҳолатига вилоятда 3 884 нафар фуқаро коронавирус инфекцияси билан касалланган, улардан 2995 нафари даволанган, 16 нафари вафот этган.

Касалликдан вафот этаётганларнинг асосий қисми уй шароитида билиб-билмай ва ўзбошимчалик билан ўзини даволаб юрганлар бўлиб чиқмоқда.

Бунинг асосий сабаби, фуқаролар ўз вақтида шифохоналарга мурожаат қилмаган ёки маҳаллий қишлоқ врачлик пунктлари, ҳудудий тиббиёт бирлашмалари ёки маҳалла фуқаролар йиғини томонидан уйда даволанаётган беморларга етарли эътибор қаратилмаётганлигидир.

Шундан келиб чиқиб, Халқ депутатлари вилоят Кенгаши депутатларига ҳудудлардаги "колл-марказ", мобил гуруҳлар, тез ёрдам хизмати ва тиббиёт бирлашмалари фаолиятини доимий равишда ўрганиб, назорат қилиб бориш тавсия этилмоқда.

Депутатларнинг тавсияси асосида фаол ишлаганлар рағбатлантирилиши ёхуд қатъий интизомий чорага тортилиши кўзда тутилмоқда.

Бу ҳақда 2020 йил 7 августда Тошкент вилояти ҳокими Р.Холматовнинг "Коронавирус инфекциясининг тарқалишининг олдини олиш ва унга қарши курашишда ўзини-ўзи бошқариш органлари ролини ошириш ва ҳамкорликдаги ишларни кучайтириш чора-тадбирлари тўғрисида"ги №333-сонли қарори қабул қилинди.

Ушбу қарор асосида маҳалла фуқаролари йиғини раиси ўз ҳудудида уй шароитида даволанаётган беморларга ўз вақтида ва тўғри тиббий ёрдам кўрсатилишини ташкил этиш учун масъуллиги белгиланди.

@hokimiyat_hujjatlari

⚡️ Чирчиқ шаҳридаги собиқ техникум биноси инвестиция ва ижтимоий мажбуриятлар белгилаган ҳолда "Universal Gisht Savdo" МЧЖга сотилди

Чирчиқ шаҳар ҳокимлиги балансидаги 4228,14 кв.м.дан иборат собиқ техникум биноси 9,0 млрд сўм миқдорида инвестиция киритиш орқали спорт ва соғломлаштириш мажмуаси, тиббий хизмат кўрсатиш маркази қуриш учун вилоят ҳокимлиги томонидан "Universal Gisht Savdo" МЧЖга сотилди.

Шунингдек, тадбиркор томонидан собиқ техникум биноси ўрнида хизмат кўрсатиш марказлари қурилишидан ташқари кейинчалик мазкур объектда турар-жойлар ҳам қуриб, унинг 30 та хонадонини ногирон ёки моддий томондан кам таъминланган оилаларга бириктирилиши учун Чирчиқ шаҳар ҳокимлиги балансига беғараз ўтказиши ҳам белгиланган.

@hokimiyat_hujjatlari

⚡️ Қибрайдаги фойдаланилмаётган объект ўрнида наслли эчкичилик ва чорвачилик мажмуаси ишга туширилади

Қибрай тумани, Ўнгқўрғон қишлоғида жойлашган Тошкент вилояти балансидаги "Чорвачилик фермаси" объекти анча йиллардан буён бўш туриб, фойдаланилмаётган эди. "YAGONA GO`SHT BARAKA" МЧЖ ушбу объектга 24 ой давомида 840,0 минг АҚШ доллари миқдоридаги инвестиция киритиш орқали наслли эчкичилик ва замонавий чорвачилик мажмуаси фаолиятини йўлга қўйиш ҳамда 45 та янги иш ўрни яратиш шарти билан "ноль" харид қийматида сотиб олиш таклифи билан чиқди.

Ушбу таклиф Давлат мулкини сотишда тендер савдоларини ўтказиш бўйича вилоят ҳудудий танлов комиссияси томонидан маъқулланиб, Тошкент вилояти ҳокимлиги билан лойиҳа ташаббускори ўртасида Меморандум тузилди ва "ноль" харид қийматда сотилди.

Бу ҳақда жорий йил 5 августда Тошкент вилояти ҳокими Рустам Холматовнинг "Бўш турган давлат кўчмас мулки объектларидан келгусида самарали фойдаланиш чора-тадбирлари тўғрисида"ги №332-сонли қарори қабул қилинди.

Эндиликда ушбу қарор вилоят Кенгаши сессиясида депутатлар томонидан тасдиқдан ўтказилиши лозим.

@hokimiyat_hujjatlari

⚡️ Ангренда янги ишлаб чиқариш лойиҳаларига ер майдонлари ажратилди, мажбуриятларини бажара олмаганларники эса давлат захирасига қайтарилади

Жорий йил 6 августда Тошкент вилояти ҳокими Рустам Холматов бошчилигида вилоят Эркин иқтисодий зонаси ва кичик саноат зоналари Маъмурий кенгашининг навбатдаги йиғилиши бўлиб ўтди.

Йиғилишда "Ангрен" ЭИЗ ҳудудида инвестиция лойиҳаларини жойлаштириш бўйича янги инвестиция буюртманомалари кўриб чиқилиб, ҳудудда фаолият кўрсатаётган корхоналар таклифи ўрганилди. Пандемия туфайли амалга оширилиши кечикаётган лойиҳаларни ишга тушириш муддатлари ҳам қайта кўриб чиқилди.

Йиғилиш қарорига кўра, қуйидаги лойиҳаларни амалга ошириш учун ер ажратишга ижобий хулосалар берилди:

❇️ "ПВХ панеллар ва безакли полимер плёнка ишлаб чиқариш",
❇️ "Автотранспорт воситалари учун газ баллонлар ишлаб чиқариш",
❇️"Ун ва макарон маҳсулотлари ишлаб чиқариш",
❇️"Гикроскопик момиқ пахта ишлаб чиқариш",
❇️"Кенг ассортиментдаги замонавий электротехника маҳсулотларини ишлаб чиқариш"

Шунингдек, 2017 йил 24 октябрда "Angren Technology Group" МЧЖ ҚК ва унинг инвесторлари билан имзоланган битим инвестиция ва ижтимоий шартлари йиллаб бажарилмаганлиги сабабли, бир томонлама бекор қилинади.

Вилоят ЭИЗ ва КСЗ Маъмурий кенгашининг 2018 йил 8 августдаги 21-сонли баённомасига асосан, "Enertek Investment" МЧЖнинг "Мойлаш материаллари ва металл таралар ишлаб чиқариш" лойиҳаси учун ажратилган 2.0 гектар ер майдони ўтган 2 йил мобайнида фойдаланилмагани сабабли, МЧЖга доимий фойдаланиш ва эгалик қилиш ҳуқуқлари бекор қилиниб, ер давлат захирасига қайтарилади.

@hokimiyat_hujjatlari

#янги_лойиҳа

❗️Диққат, диққат!

Тошкент вилояти ҳокимининг қарорлари, фармойишлари, шунингдек, вилоят ҳокими ўринбосарларининг турли йиғилиш баёнлари, вилоят шаҳар, туман ҳокимларининг қарор ва фармойишларини кузатиб боришни хоҳлайсизми?

⚡️ Эндиликда сиз Тошкент вилояти ҳокимлиги Ахборот хизмати мутахассиси Дилфуза Рўзиеванинг лойиҳаси - @hokimiyat_hujjatlari телеграм расмий канали орқали расмий услубдан ҳоли, содда тилда шарҳланган вилоят ижтимоий-сиёсий ҳаётида муҳим бўлган ҳужжатлар билан танишиб бориш имконига эгасиз.

👉 КАНАЛГА УЛАНИШ УЧУН ҲАВОЛА

⚡️ Пандемия сабабли фаолияти тўхтаб қолган тадбиркорлар қўллаб-қувватланди

Карантин сабабли, кўплаб тадбиркорларнинг фаолияти тўхтаб қолиб, зиммаларига юклатилган мажбуриятлари ўз вақтида амалга ошмай қолди. Шу сабабли, уларнинг аксарияти Тошкент вилояти ҳокимига енгиллик сўраб, мурожаат қилишди.

Жорий йил 6 август куни Инқирозга қарши курашиш республика комиссияси ҳудудий (Тошкент вилояти) штабининг навбатдаги йиғилиши бўлиб ўтди. Вилоят ҳокими Рустам Холматов раислик қилган мазкур йиғилишда тадбиркорларнинг мурожаатлари ўрганилиб, атрофлича муҳокама қилинди.

Жумладан, коронавирус пандемияси сабабли, инвестициявий ва ижтимоий мажбуриятларни бажариш шарти билан берилган давлат активлари бўйича тузилган амалдаги олди-сотди шартнома шартлари бажарилмай қолган лойиҳаларнинг мажбуриятларини бажариш муддатларини узайтириш ҳамда карантин даврида фаолияти тўхтатилган соҳаларда ижара тўловлари ҳисобланиши ва ундирилишини вақтинча тўхтатиш каби масалалар кўриб чиқилди.

Айтиш жоизки, бугунги кунда Тошкент вилоятида бўш турган 1300 тадан ортиқ давлат мулки уч томонлама ижара шартномаси асосида жисмоний ва юридик шахсларга ижарага берилган.

Шунингдек, Давлат активларини бошқариш агентлигининг Тошкент вилояти ҳудудий бошқармаси томонидан инвестициявий ва ижтимоий мажбуриятларни бажариш шарти билан 231 та олди-сотди шартномалар рўйхатга олинган.

Йиғилиш якунида штаб аъзоларининг қарорига кўра, пандемия сабабли, 738 та ижарага берилган давлат мулки объектларидан 1027 та расмийлаштирилган ижара шартномалари асосида фойдаланиб келаётган жисмоний ва юридик шахслар бўйича ижара тўловларининг ҳисобланиши ва ундирилиши белгиланган муддатга мувофиқ тўхтатилди.

@hokimiyat_hujjatlari

⚡️ Тошкент вилоятининг Олмалиқ шаҳри ва Қуйи Чирчиқ туманидаги айрим жой номлари ўзгармоқда

Жорий йил 10 август куни Географик объектларни номлаш ва қайта номлаш масалалари бўйича Тошкент вилояти комиссиясининг навбатдаги йиғилиши бўлиб ўтиб, тегишли тартибда йиғилиш баёни тасдиқланди.

Мазкур йиғилиш баёни қарорига кўра, Олмалиқ шаҳридаги 99 та кўча номлари давлат реестрига кирмай қолганлиги сабабли, номлари қайтадан тасдиқланди. Масалан, Олмалиқ шаҳридаги 1-тупик "Маърифат" кўчаси эндиликда "Marifat" 1-berk kochasi сифатида номланиб, давлат тилига мувофиқлаштирилди.

Шунингдек, Қуйи Чирчиқ туманидаги 228 та кўча ва 3 та аҳоли яшаш пунктларига ҳам янги ном берилди. Авваллари тумандаги "Маданият" МФЙдаги 1-бўлим, 4-бўлим ва 5-бўлим деб номланган ҳудудлар эндиликда "Гулобод", "Мўминобод", "Файзобод" қишлоғи дея ўзгартирилди.

Юқоридаги йиғилиш баёни эндиликда маҳаллий Кенгаш томонидан сессия кун тартибига киритилиб, тасдиқдан ўтказилиши лозим.

@hokimiyat_hujjatlari

Мустақиллик байрами қандай ўтказилади?

Тошкент вилояти ҳокимининг 10 август куни имзолаган қарорига мувофиқ, давлат мустақиллигининг 29 йиллик байрамига тайёргарлик кўриш ва уни ўтказиш бўйича вилоят комиссияси тузилди.

"Сен – қудрат манбаи, саодат маскани, жонажон Ўзбекистоним!" деб номланган бош ғояни ўзида мужассам қилган маънавий-маърифий тадбирлар карантин қоидаларига амал қилган ҳолда, онлайн шаклда ўтказилиши белгиланди.

Бундан ташқари, ижодкорлар ўртасида анъанавий тарзда ўтказиб келинаётган "Энг улуғ, энг азиз", "Ранглар жилосида она диёр", "Ватан менинг нигоҳимда", "Ватан учун яшайлик" сингари кўрик-танловлар жорий йил ҳам онлайн тартибда ташкил этилади.

@hokimiyat_hujjatlari

Бисмиллоҳир роҳманир раҳим. Мазкур каналда Тошкент вилояти ҳокимлиги, шаҳар ва туманлар ҳокимликлари томонидан қабул қилинган расмий ҳужжатлар, унинг қисқача мазмуни билан танишасиз.