Телеграм канал «ELTUZ»

МАТБУОТ КОТИБИ КЎЗИ ОЖИЗ ЖУРНАЛИСТНИНГ НУҚСОНИНИ КАЛАКА ҚИЛДИ Кўкдала тумани ҳокимлигининг ахборот хизмати раҳбари, туман ҳокимининг матбуот котиби Отабек Артиқов ўзининг инстаграм саҳифасида “Taftish.uz”нинг қамалган кўзи ожиз ходимини калака қилиб видео чиқарди. Айни кунда омма эътибор марказидаги ОАВ вакиллари билан содир бўлган воқеадан хурсанд Кўкдала туман матбуот котиби "Мени гапимга кирмаган ...га киради" деган мазмундаги овозли хабарни ҳам қолдиришни унутмаган. Вахолангки, "Taftish.uz" ходимларининг Кўкдала туманига боришдан олдинги ҳаракатлари ҳам жамоатчиликка аён бўлиб бўлган эди. Изоҳларда катта эътироз билдирилмоқда. Мумкин, улар товламачи ва нохолисдир. Аммо ҳокимият ходими, давлат хизматчиси бўлган Артиқов, бирор суд қарори чиқмасидан туриб, кўзи ожиз бир инсонни бунақа калака қилиб видео қўйиши бу на давлат хизматчиси этикасига, на инсонийлик принсипларига тўғри келади. Ҳокимлик вакиллари қачон омма олдида ўзини тутишни, гапини филтрлаб гапиришни ўрганади? Омма олдида ҳар нарсани алжирайдиган ҳокимлар, мелисалар ва мана бунга ўхшаш матбуот котибларини жазолаш механизми ўйлаб топилсин. Бунақа пандавақи давлат мулозимларининг бир ойлигини кесиб Тошкентдаги академик биратнинг Навоий номидаги Тил адабиёт институтида бир ой мажбурий ўқитиш керак. Нутқ маданияти, давлат хизматчисининг нотиқлик одоби деган масалаларни ўргансин. Ана сизга университетни тижоратлаштириш учун, жоҳил мулозимларни тарбиялаш учун Элтуздан ғоя. 👉 ХАБАР БЕРМОҚЧИ БЎЛСАНГИЗ ЁКИ МУРОЖААТ ЙЎЛЛАМОҚЧИ БЎЛСАНГИЗ 💬Telegram |📱Facebook | 🐦Twitter |📱Instagram |📺YouTube

⚡️ТЕЛЕВИЗОР ЎҒРИСИ ЖАЗОСИЗ ҚОЛМАДИ Бекободлик вақтинча ишсиз бўлган А. Асранкулов 2025 йил 19 ноябрь куни соат 20:00 ларда ўзига олдиндан таниш бўлган Ҳ.Утегенованинг уйидан бозор нархи жами 6.000.000 сўмлик “ROISON” номли телевизорини ўғирлаб, ушбу телевизорни ўзининг шахсий эҳтиёжлари учун ишлатиш мақсадида яшаш хонадонига яшириб қўйган. Суд залида айбланувчи ўғриликка тушган пайти маст бўлганини, шу куни ўғли билан кўришганида онаси телевизор олмоқчи бўлиб юрганини айтганини, у ичган вақтида айтган гаплари эсига тушиб пули йўқлиги сабабли Ҳ.Утегенованинг уйидаги телевизор эсига тушиб қолиб, ўғриликка боргани ҳақида кўрсатма берди. У бу уйда ҳеч ким яшамаслигини билгани учун ҳам олдиндан режалаштирилган ўғрилиги хамирдан қил суғургандек юз берганини тан олган. Суд А.Асранкуловнинг содир этилган жиноий ҳаракатлари Ўзбекистон Республикаси ЖКнинг 169-моддаси 2-қисми “г” банди билан ўғрилик, яъни уй-жойга ғайриқонуний равишда кириб, ўзганинг мол-мулкини яширин равишда талон-тарож қилишда айбдор деб топиб, унга шу модда билан иш ҳақидан 10 фоиз давлат даромади ҳисобига ушлаб қолган ҳолда 2 (икки) йил муддатга ахлоқ тузатиш ишлари жазоси тайинлади. Телевизор ўғриси ахлоқини тузатяпти. 👉 ХАБАР БЕРМОҚЧИ БЎЛСАНГИЗ ЁКИ МУРОЖААТ ЙЎЛЛАМОҚЧИ БЎЛСАНГИЗ 💬Telegram |📱Facebook | 🐦Twitter |📱Instagram |📺YouTube

⚡️ИЧКИ ИШЛАР АКАДЕМИЯСИДА ТАНИШ-БИЛИШЧИЛИК ВА ИМТИЁЗЛАР ТИЗИМИ КУЧАЙМОҚДА Элтуз таҳририятига Ички ишлар вазирлиги Академиясидаги ҳолатлар бўйича мурожаат келиб тушди. Унда таъкидланишича, Ички ишлар вазирлиги Академиясида таниш-билишчилик ва айрим курсантларнинг ҳатто кичик мансаб ваколатларидан фойдаланиши тобора кучайиб бормоқда. Мурожаат муаллифининг ёзишича, бундай курсантлар академиядаги шахсий хавфсизлик бўлими, ҳатто академия раҳбарияти томонидан ҳам қўллаб-қувватланмоқда. Қолган курсантлар эса эътибордан четда қолиб, барча имконият ва имтиёзлар айни шу “танланганлар”га тақдим этиляпти. Муаллиф бу ҳолатни академия ичида шаклланган “олий олигарх жамоа” сифатида таърифлайди. Айниқса, “арча кесувчилар” деб аталадиган гуруҳга алоҳида эътибор қаратилаётгани таъкидланади. Мурожаатга кўра, бу гуруҳ аъзолари оддий курсантлар эмас, улар орасида пора олиш, ўз таниш-билишларини жамоага киритиш каби ҳолатларга йўл қўйилаётгани айтилмоқда. Шу билан бирга, академия бошлиғи Р.А. Хатамов ва унинг ўринбосари Ражабов ушбу гуруҳни моддий манфаат кўзлаб доимий равишда қўллаб-қувватлаётгани ҳақида даъволар келтирилган. Мурожаатда алоҳида қайд этилишича, пора олувчи курсантлар билан раҳбарият ўртасидаги боғловчи шахс сифатида 3-курс курсанти Ислом Ўринов тилга олинади. Айтилишича, бу ҳолатлардан кўпчилик хабардор бўлса-да, унга нисбатан ҳатто шахсий хавфсизлик бўлими томонидан ҳам ҳеч қандай чора кўрилмаяпти. Мурожаат муаллифи фикрича, агар ИИВ тизимининг таянчи ҳисобланган ушбу таълим муассасасида бундай ҳолатлар ўз вақтида бартараф этилмаса, келгусида порахўрлик ва тамагирлик янада кучайиб бориши мумкин. Шу боис, у мутасадди идораларни Ички ишлар Академиясидаги мазкур ҳолатларга жиддий эътибор қаратишга чақирмоқда. 👉 ХАБАР БЕРМОҚЧИ БЎЛСАНГИЗ ЁКИ МУРОЖААТ ЙЎЛЛАМОҚЧИ БЎЛСАНГИЗ 💬Telegram |📱Facebook | 🐦Twitter |📱Instagram |📺YouTube

УРГАНЧ–БЕГОВОТ ЙЎНАЛИШИДА ЙЎЛ ҲАҚҚИ АСОССИЗ ОШИРИЛГАНИДАН АҲОЛИ НОРОЗИ Ассалому алайкум Элтуз. Хоразм вилояти Урганч туманидан ёзяпмиз. Урганч–Беговот йўналишида қатнайдиган «Дамас» машиналари йўл ҳаққини 6000 сўмдан бирданига 10 000 сўмга ошириб олишди. Бунга асосий сабаб сифатида ҳаво совиб, газ заправкалар ёпилгани кўрсатилмоқда. Беговот–Урганч линиясида қатнайдиган дамасчилар бензинда юряпмиз, деган баҳона билан йўл ҳаққини инсофсизларча кўтариб олишди. Газ заправкалар қайта очилиб, иш бошлагандан кейин ҳам йўл ҳаққини аввалги нархига туширишмаяпти. Заправкалар вақтинча ёпилганини баҳона қилиб, нега нархни оширишади? Нега фақат оддий халқ жабр кўриши керак? Дамасчилар совуқда ҳам одамлар барибир дамасга минади, деб йўл ҳаққини хоҳлаганча кўтаришяпти. Аҳоли бундан жуда норози. Кўпчилик одамлар жанжал қилиб, дамасга чиқмай тушиб кетишяпти. Бу дамасчиларга йўл ҳаққини ҳеч кимдан сўрамай оширишга ким ҳуқуқ берди? Аҳолига транспорт хизмати кўрсатаётган автоуловларнинг йўл ҳаққини назорат қиладиган ташкилот борми ўзи? Уюшмалар талаб даражасида ишламайди: печат босиб бериб, пулини олса бўлди. Дамасчиларда “беспредел” бўлиб кетганининг яна бир сабаби шуки, Беговот линиясида дамаслардан ташқари фақат битта автобус юради. Автобус ҳар икки соатда бир марта қатнайди. Шунинг учун одамлар автобусни кутиб ўтирмай, мажбур дамасга чиқишяпти. Дамасчилар эса оддий халқни очиқ-ойдин талашяпти. Нега бу масалани тегишли ташкилотлар назорат қилмайди? Бошқа йўналишлардаги дамаслар йўл ҳаққини ўзбошимчалик билан оширмаяпти-ку. Бизнинг илтимосимиз шуки: дамаслар ўрнига «Газель» машиналари қўйиб берилсин ёки йўл ҳаққи 10 000 сўмдан яна 6000 сўмга туширилсин. 👉 ХАБАР БЕРМОҚЧИ БЎЛСАНГИЗ ЁКИ МУРОЖААТ ЙЎЛЛАМОҚЧИ БЎЛСАНГИЗ 💬Telegram |📱Facebook | 🐦Twitter |📱Instagram |📺YouTube

МИЛЛИЙ СЕРТИФИКАТ ИМТИҲОНЛАРИ БОШЛАНМАЙ САВОЛЛАР ҚЎЛМА-ҚЎЛ БЎЛИБ КЕТДИ Элтузга келган маълумотга кўра, 18–19 январ кунлари бўлиб ўтиши керак бўлган тарих фанидан миллий сертификат имтиҳони саволлари имтиҳондан анча олдинёқ қўлма-қўл тарқалиб бўлган. Ҳолбуки, имтиҳон ҳали ўтказилмаган. Бу эса “миллий сертификат” тизими атрофидаги савол ва шубҳаларни янада кучайтирмоқда. Норозиларнинг таъкидлашича, тарихдан сертификат олиш учун мўлжалланган тест саволлари аллақачон абитуриентлар, ўқитувчилар ва ўқув марказларида айланиб юрибди. Рўйхатда Васил Левский, Самори Туре, Хендрик Витбой, Христо Ботев, Самуил Магерреро, Кечвало каби шахслар ҳақидаги савол-жавоблар, шунингдек, Африка колонияларининг тарихий номлари (“Германия Шарқий Африкаси”, “Олтин қирғоқ”, “Жанубий Родезия” ва ҳ.к.) бор. Яъни абитуриентлар имтиҳонга “тайёрланиш” баҳонасида айнан келадиган жавобларни ёдлаётгани айтилмоқда. Маълумотларда, шунингдек, замонавий Ўзбекистонга оид бир қатор саволлар ҳам бор: “2005 йил Олий Мажлис Сенати раиси ким бўлган?”, “Қайси амир даврида ‘амирона’ солиғи жорий этилган?”, “Марказий сайлов комиссияси аъзоси бўлиш учун неча ёш керак?” каби саволлар аниқ жавоблари билан бирга тарқатилгани қайд этилади. Яъни гап тахмин ёки ғийбатда эмас, тайёр “савол–жавоб пакетлари” ҳақида кетмоқда. Норозиларнинг фикрича, бу ҳолат миллий сертификат тизимини амалда “миллий коррупция”га айлантириб қўйган. Агар саволлар олдиндан сотилаётгани ёки таниш-билиш орқали берилаётгани рост бўлса, ўз меҳнати билан ўқиган ўқувчи емас, пул ва “алоқа”си борлар ютқазиши эмас, аксинча, ютиб чиқиши мумкин. Бу эса имтиҳон натижасини ўқувчининг билим даражаси эмас, бошқа омиллар белгилаётганини англатади. Таълимда адолат ва шаффофликка ишонувчи ўқитувчи ва ўқувчилар учун бу каби ҳолатлар қўшимча зарба бўлмоқда. Чунки миллий сертификат расман “ҳаққоний ва холис баҳолаш мезони” сифатида тарғиб қилинаётган бир пайтда, саволлар олдиндан тарқалиши бутун тизимнинг обрўсига путур етказади. Кейинчалик қайси натижа ҳақиқий меҳнат билан олинган, қайси бири эса “тайёр жавоблар” эвазига қўлга киритилгани аниқлаш имкони деярли йўқ. Элтузга келган маълумот таълим соҳасида жамоатчилик назоратининг етишмаслигини ҳам кўрсатади. Саволлар устидан мустақил мониторинг борми? Саволларни тайёрловчи ва тарқатиш занжирига кимлар масъул? Бу саволларга очиқ жавоб йўқ экани вазиятни янада шубҳали қилади. 👉 ХАБАР БЕРМОҚЧИ БЎЛСАНГИЗ ЁКИ МУРОЖААТ ЙЎЛЛАМОҚЧИ БЎЛСАНГИЗ 💬Telegram |📱Facebook | 🐦Twitter |📱Instagram |📺YouTube

МАДАНИЯТ БОШҚАРМАСИНИНГ «УРА ПАТРИОТ» РАҲБАРИ ДАМ ОЛИШ КУНИДА ХОДИМЛАРИНИ ҚИДИРИБ ЮРИБДИ Навоий вилояти маданият бошқармаси бошлиғи шанба дам олиш куни ишхонада тентираб ходимларини қидирмоқда. Мадвазир расман 5 кунлик иш режимини жорий қилган. Бироқ қоғозда ёзилган қарор ва буйруқларга Навоий бошқармаси амал қилиши шарт эмас. Ўзи бўлгани бир мадбошқарма бўлса, булар ҳафтанинг 5 куни давомида қайси ёниб турган ишни бажариб улгурмаяптики дам олиш куни ҳам идорага қатнаши керак? Майли, саволни дангал қўяйлик: шанба куни ходимлар йўқлигини писанда қилиб ишга чақириш билан раҳбар муҳим шахс эканини кўрсатадими? 👉 ХАБАР БЕРМОҚЧИ БЎЛСАНГИЗ ЁКИ МУРОЖААТ ЙЎЛЛАМОҚЧИ БЎЛСАНГИЗ 💬Telegram |📱Facebook | 🐦Twitter |📱Instagram |📺YouTube

ВАҚТ МАШИНАСИ: 17 ЯНВАРЬ - «НАУТИЛУС» ИЛК АТОМ СУВОСТИ КЕМАСИ ЯРАТИЛДИ 1955 йил 17 январь куни эрталаб АҚШнинг Коннектикут штати қирғоқларида тарихий воқеа юз берди. Дунёдаги илк атом сувости кемаси — «Nautilus» (SSN-571) илк бор очиқ денгизга чиқди ва кема командири Деннис Уилкинсон дунёга машҳур бўлган мана бу қисқа хабарни йўллади: «Биз сув остида ядро энергияси ёрдамида ҳаракатланмоқдамиз». Бу воқеа нафақат янги ҳарбий техника, балки инсониятнинг энергиядан фойдаланиш тарихида янги даврни бошлаб берди. «Наутилус»гача бўлган барча сувости кемалари аслида «сувга шўнғийдиган қайиқлар» эди. Улар дизель-электр двигателларида ишларди ва бир талай жиддий камчиликларга эга эди. Дизель двигателлари ишлаши учун жуда кўп кислород талаб қиларди, шу сабабли кемалар тез-тез сув юзига чиқиши ёки махсус най (шноркель) орқали ҳаво олиши шарт эди. Улар сув остида фақат аккумулятор батареялари ҳисобига ҳаракатланарди, бу эса узоғи билан бир неча кунга етарди. Сув ости «уйи» «Наутилус» мутлақо бошқача эди. Унинг ядровий реактори бир неча йил давомида ёқилғи қуймасдан ишлаши мумкин эди. Кеманинг юриши фақат экипажнинг озиқ-овқат захирасига боғлиқ эди. У ҳавога эҳтиёж сезмасдан ҳафталаб, ҳатто ойлаб сув остида қола оларди. Бу уни душман учун деярли кўринмас қиларди. Ядро энергияси кемага сув остида соатига 20 узелдан (тахминан 37 км/соат) юқори тезликда ҳаракатланиш имконини берди. Шимолий қутбнинг забт этилиши «Наутилус»нинг энг машҳур оламшумул ютуғи 1958 йилда содир бўлди. «Sunshine» (Қуёш нури) амалиёти доирасида у дунёда биринчи бўлиб Шимолий қутбни сув остидан сузиб ўтди. Илгари ҳеч бир кема қалин музликлар туфайли қутбга етиб бора олмасди. «Наутилус» эса музларнинг тагидан ўтиб, география ва навигация тарихида янги саҳифа очди. Бу воқеа совуқ уруш даврида АҚШнинг технологик устунлигини бутун дунёга намойиш этган эди. «Наутилус» 25 йил давомида хизмат қилди ва 1980 йилда флотилия таркибидан чиқарилди. Ушбу кема яратган анъана туфайли ҳозирги кунда дунёнинг энг қудратли давлатлари (АҚШ, Хитой, Буюк Британия, Франция) флотининг асосини айнан атом сувости кемалари ташкил этади. 👉 ХАБАР БЕРМОҚЧИ БЎЛСАНГИЗ ЁКИ МУРОЖААТ ЙЎЛЛАМОҚЧИ БЎЛСАНГИЗ 💬Telegram |📱Facebook | 🐦Twitter |📱Instagram |📺YouTube