Телеграм канал «በክርስቶስ ( in christ)»

(ጥሬ ፀሎት) ጥሬ ፀሎት የሚለው ቃል ፍሊፕ ያንሲን የሚጠቀመው ቃል ነው ። ያልተቀባባ ፀሎት ፣ ያልተሸፋፈነ ፀሎት እንደማለት ነው ። እግዚአብሔር ጥሬ ፀሎት ይወዳል ።  ጥሬ ፀሎት የሆንነውን ነን የምንልበት ፣ ያልቻልነውን አልቻልንም የምንልበት  ንፁህ ያልተቀባባ ፀሎት ነው ። የፈሪሳዊ ፀሎትና የቀራጩ ፀሎት በግልፅ የምናየው አይነተኛ ፀሎት ነው (ሉቃስ 18) ። ፈሪሳዊ ቅብ ፀሎት ያለበት ይመስላል ፣ በፀሎቱ ውስጥ ይመፃደቃል ፣ ራሱን በትዕቢት ይወጥራል ፣ ራሱን ከቀራጮች ጋር ያወዳድራል ። ቀራጩ ደግሞ አይኑን ቀና ማድረግ ከብዶት ፤ ደረቱን እየደቃ በድያለው ማረኝ ይላል  ። በጌታ ኢየሱስ ፊት ቀራጩ የፀለየው ፀሎት ጥሬ ፀሎት ነው ። በእግዚአብሔር ፊት ያልተቀባባ ፀሎት ነው ። የፈሪሳዊ ደግሞ ቅብ ፀሎት ራስን ፅድቅ ማስቆጠር የንግግር ችሎት የሚታይበት ፀሎት ነው ። በእግዚአብሔር ፊት ስንሆን በእግዚአብሔር ፊት እንደሆንን ማወቅ አለብን ። እግዚአብሔር ፊት የሚደበቅ የሚሰወር ምንም ነገር የለም ። በፊቱ ስንቀርብ እሱን በእርግጥም ስለሚያየን ራሳችን አጋልጠን መሆን አለበት ። ጥሬ ፀሎት በእግዚአብሔር እጅ ላይ መዋረድ ነው ። ፀሎት ላይ ስሌት ሳይሆን የሚያዋጣው ፍሰት ነው የተሻለው ። በእግዚአብሔር ፊት ማስላት ሳይሆን በእግዚአብሔር ፊት መፍሰስ  ነው ትልቁ ጉዳይ ለዚህም ነው ያልተቀባባ ጥሬ ፀሎት ያስፈለገው ። @cgfsd

ከመስቀሉ ፊቱን የሚያዞር ሰው ከእግዚአብሔር ነው ፊቱን የሚያዞረው እግዚአብሔር የተገለጠው በዛ ስፍራ ስለሆነ ።         ጳውሎስ ፈቃዱ

(ሳለ-አይሰጥ ) ስጋ ተመጋቢ አልፎም አጥንት ወዳጅ የሆነ ሰው ስለ ሳለ-አይሰጥ በደንብ አድርጎ ያውቃል ። በሳለ-አይሰጥ አጥንት የማይማረር ተመጋቢ አይኖርም ። ይሔ አጥንት ስጋ ያለው ነው ፤ ሲታይ ደስ ይላል ፣ ብሉኝ ፣ ብሉኝ ያሰኛል ነገር ግን ለመብላት አይመችም ። ምንም እንኳን ስጋ ያለው ቢሆንም  ዙሪያ ያለው አጥንት ወጣ ገባ ያለ በመሆኑ ለመብላት አዳጋችና ከባድ ያረገዋል ። ስለዚህ ስጋ እያለው አይሰጥም በሚል ሀሳብ ይሔ አጥንት ሳለ-አይሰጥ የሚል ስያሜ ወጣለት ።  ስጋ እያለው አይሰጥም ! ሳለ-አይሰጥ ለመንፈሳዊ ህይወታችን ጥሩ ምሳሌ ሊሆን የሚችል ማሳያ ነው ። ጥሩ ነገር እያለን ፣ ፀጋ እያለን ፣ በጎ መንፈሳዊ ልምምዶች እያሉን ፤  ለሌላው ለማካፈል ፣ ለመቆረስ አለመመቸት የሳለ-አይሰጥ ምሳሌ ነው ። በጎ መንፈሳዊ ልምምድ ፣ ዕውቀት አለን ማለት ለሌላው የምንመች የምናካፍል ነን ማለት አይደለም ። ክርስቲያን የክርስቶስ ህይወትና ብርሃን እያለው ግን ለሌሎች የማይመች የባህሪ ችግር ካለበት ፤  ስጋ እያለው ለመብላት እንዳልተመቸው አጥንት ምሳሌ ይሆናል ። ክርስቲያን ነኝ ብቻ ሳይሆን ለሌሎች የሚቆረስ የሚበላ ህይወትና ባህሪ አለን? የሚለው የሁልጊዜ ጥያቄ ነው ። ከሳለ-አይሰጥ ጌታ ይጠብቀን ። @cgfsd

(ሶስቱ ዘፀአት ) ዘፀአት ትክክለኛ ትርጓሜው መውጣት ማለት ነው ። ይሔን ሀሳብ በይበልጥ የምናውቀው እስራኤላዊያን ከ430 ሰላሳ አመት ከግብፅ ባርነት የወጡትን መውጣት ያሳያል ። ሶስት ዘፀአት በመፀሃፍ ቅዱሳችን እንደነበረ በግልፅ እንመለከታለን ። የመጀመሪያው በግብፅ የነበረው ዘፀአት ነው ፣ ሁለተኛው በባቢሎን የታየው ዘፀአት ፣ ሶስተኛ ደግሞ በኢየሩሳሌም የሆነው ታላቁ ዘፀአት ነው ። የግብፅ ዘፀአት(መውጣት) እስራኤላዊያን እየደረሰባቸው ከነበረው አስከፊ ባርነት የወጡት መውጣት ነው ። በዚህ ዘፀአት ዋነኛ አላማው ከባርነት ህዝቡን ማላቀቅ ይሁን እንጂ  መጨረሻ ዋነኛው የሆነው በእስራኤል አምላክ እንዳለ በግብፅም ሆነ በቀሩት የአህዛብ መንግስታት መካከል የእግዚአብሔር ስም ታወቀ ፤ ስሙ ከፍ አለ ። የፀና ክንዱ ፤ የበረታች እጁ በሁሉ ታየ ። በዚህ መውጣት ዘፀአት ውስጥ በርካታ ተአምራት ተደርገዋል ከተአምራቱ ጀርባ ያለው ከግብፅ አማልክት በላይ እግዚአብሔር አምላክ እንደሆነ ታየበት ። በግብፅ የተደረጉት አስሩም መቅሰፍትና ተአምራት በግብፅ እንደ አምላክ ይቆጠሩ ነበር ። ለምሳሌ ጓጉንቸር ይመለካል ፣ ውሃ ወደ ደም ሲቀየር ውሃ ይመለክ ነበር ፣ በኩር ሲሞት በኩር ይመለክ ነበር ። በግብፅ ዘፀአት የተደረገው ተአምራት እግዚአብሔር ከሁሉ በላይ እንደሆነ ስሙ የገነነበት ዘፀአት ነበር ። ከባርነት ተላቀው ባደረጉ የአርባ አመት ጉዞአቸው ውስጥ የእግዚአብሔር ያልተቋረጠ አቅርቦትና መጋቢነት ነበር ። መና ይመገባሉ ፣ የማያልቅ ልብስ ይለብሳሉ ። እግዚአብሔር ከበረበት ! ሁለተኛ ዘፀአት ደግሞ በባቢሎን የነበረው ዘፀአት ነው ። ህዝበ እስራኤል ወደ ባቢሎን ለሰባ አመታት በግዞት ተወስደዋል ።  በባቢሎን ቆይታቸው የኩራት የክብር መገለጫ የሆነው የኢየሩሳሌሙ መቅደስ ፈረሰ ፣ ህዝቡ ተሰደበ፣ የከተማው በር ቅጥሮች ፈረሱ ፣ ከተማው ወደመ ። በባቢሎን ምርኮ ሁነው ህጉን መማር ናፈቃቸው  ። እግዚአብሔር 70 አመቱ አልቆ በባቢሎን ፈንታ ፋርስ ሲነግስ ። እስራኤላዊያን መመለስ ጀመሩ ። የባብሊሎን ዘፀአት መንፈሳዊ ተሃድሶ ያለው ነበር ። ይሔ ዘፀአት የእግዚአብሔር ፊት ለመፈለግ የመጡበት ነበር ፣ መቅደሱን ለመስራት የተመለሱበት በዓላማ የወጡበት ዘፀአት ነበር ። በባቢሎን ዘፀአት ምንም እንኳን መከራ ቢኖረውም እግዚአብሔር ስሙ በእነ ዳንኤል የከረበት የእስራኤል አምላክ ተብሎ ስሙ የተጠራበት ነበር ።ከዚህ ዘፀአት ጀርባ የእግዚአብሔር ስም የከበረበት ነበር ። ሶስተኛው ዘፀአት በመፀሃፍ ቅዱሳችን የተገለጠው የኢየሩሳሌሙ አዲሱ ዘፀአት ወይም መውጣት ነው ። ይሔ መውጣት በክርስቶስ ሞትና ትንሳኤ የተፈፀመ መውጣት ነው ። ሰው ተረግጦ ከተያዘበት የሀጢያት ፣ የሞት ፣ የሰይጣን ባረነት በክርስቶስ ህይወት ፣ ሞትና ትንሳኤ ሊወጣ ዘፀአት ሊሆን ተችሏል ። በዚህ ምክኒያት በዚሁም ዘፀአት መውጣት ውስጥ እግዚአብሔር ከበረ ሰውን የገዛውን የሀጢያትና የሞት ሰንሰለት ስለተበጠሰ እግዚአብሔ ስለ ፀጋው ክብር ከበረ ። ዘፀአት መውጣት  ለምን ሆነ  ? ለምን ?ወጡ ሲባል  በአላማ ተለይተው ለእግዚአብሔር ህዝብ ለመሆን ወጥተዋል (ዘፀአት) ሁኗል ይባላል ። ይሔ በክርስቶስ የተፈፀመው አዲሱና ታላቁ ዘፀአት አስደናቂዊ ነው ። ሉቃስ 9 ላይ እንደምናገኘው ታሪክ በኢየሱስ የተፈፀመው ዘፀአት ታላቅ መሆኑን እናያለን ። በግብፅ ዘፀአት የሚታወቀው ሙሴ ፣ በነብይነት የሚታወቀው ኤሊያስ በደብረታቦር ተራራ ኢየሱስ ጋር ሲገናኙ ከብዙ አመት በኋላ ቢሆንም  የተገለጡት ከኢየሱስ ጋር ያደረጉት ንግግር በኢየሩሳሌም ስለሚሆነው መውጣት(ዘፀአት) ነው ፤ እንጂ ስለ ግብፁ ዘፀአት ትንታኔ አልሰጡም ። ከሁሉ እንደሚበልጥ ምስክር ናቸው ። በዚህ ዘፀአት የእግዚአብሔር ህዝብ መሆንን፣ ዘላለማዊ ተስፋ ፣ የመዳን ብድራት ታይቶበታል ። በክርስቶስ መውለድ ፣ ሞትና ትንሳኤ ያየነው ዘፀአት ታላቁ ዘፀአት (The Great Exodus )ነው ። በታላቁ ዘፀአት ታላቁ እግዚአብሔር ታላቅ እንደሆነ ታየ ። @cgfsd

(ክርስቶስ ወገኔ ) የክርስቶስ ሰው መሆን እንደ ቀላል የማይታይ ክስተት ነው ። የፈጠረውን ፍጥረት ከመሆን ወዲያ ምን ጉድ አለ። አባቶች እንደፃፉት ፣ ዘማሪያን እንዳዜሙት በጠባብ ደረት በአጭር ቁመት ከመታየት በላይ ምን ይገርማል ። ይሔ ነገር ገርሞት ይሆናል ሉተር በቻለው መጠን የኢየሱስን ፍፁም ሰውነት ለማሳየት እንደሚታትር የተናገረው። ክርስቶስ ተዛምዶናል ! አዎን ከእኛ ወገን ሁኗል ። ሰው በመሆኑ የሰው ወገን ጋር ተካቷል የሰው ወገን በመሆን የሰው ሁሉ ዘመድ ሁኗል ። ግን ከሰው ሲዛመድ ከሰው ወገን ሲሆን ያለ ሀጠያት ነው ። በነገር ሁሉ እንደ ሰው ተፈትኗል  እንደ ሰው በነገር ሁሉ ሰው እንደሚያልፍ አልፏል ከሀጢያት በቀር (ዕብ 4:15)። ለዚህ ነው ክርስቶስ ወገን የሚባለው እንደ እኛው ስለሆነ ነው ።           ጳውሎስ ፈቃዱ ክርስቶስን " የኛ ሰው በሰማይ ይለዋል "። በጣም የምስማማበት  አገላለፅ ነው ። ክርስቶስ የኛ ወገን ነው ያው አሁን በሰማይ ያለን በአብ ዘንድ ስለ እኛ የታየ !! አዎ የኛ ወገን ።ደግሞ ወገንነቱ አንዴ ብቻ አይደለም ፤ የሚቀጥል ነው። በድካም ላለን አይዞን በርቱ ይላል ወገናችን የሰውነትን ድካም ያውቀዋል ።  ከሩቅ ቁሞ  አይደለም ሊያክመን የሞከረው እኛ መካከል አድሮ እኛን ሁኖ የተረዳን። ከዚህ ድካም ሊራራልን ይችላል በዚህ  ድካም እንዳንሰጠጥም ፀጋ እና ምህረትን ይሰጠናል እናም እንበረታለን ።  ታዋቂው ፀሃፊ ፊሊፕ ያንሲን በቁምላቸው ያላወቁት ኢየሱስ በማለት በተተረጎመው መፀሃፍ እንዲህ ይላሉ ።   " ኢየሱስ ከብዙ ነገሮች አንዱ ሰው የሆነው የኢዮብን ጥያቄ ለመመለስ ነው  ኢዬብ የስጋን አይን አለህን ብሎ ተከራክሯል ። " ፊሊፕ ያንሲን የኢዬብን ጥያቄ በኢየሱስ ተመልሷል ይሉናል ። ኢዬብ የስጋ አይን አለህን ማለቱ በስጋ አይን ታያለህን ስጋ ለብሰሃል የስጋን ድካም ሰው እንደሚያይ በዚህ ድካም ታያለህን እንደ ማለት ይመስላል ። አዎን ነዋ ወገን ሆን በስጋ አይን አየ ተረዳን ፣ መሰለን ፣ ከገባንበት  መውጫ በር ሆነን ። ተዛምዶን ሊጠጣ       ፅዋችን ቀዳ አምላክም ሰው ሆነ             እኛኑ ሊረዳ @cgfsd