Телеграм канал «Azatlyk»

Şu günki programmamyzda:

Balkan welaýatynyň bazarlarynda etiň gymmatlamagy bilen bir wagtda onuň hili hem ýaramazlaşdy. Bu ýagdaý sebitde iri şahly mallaryň keselläp ölmegi bilen bagly ýagdaýlaryň köpelen wagtyna gabat geldi. Azatlygyň habarçysy sebitdäki ýagdaýy gürrüň berdi.

Türkmenistanda daýhan hojalyklaryna we pileçi kärendiçilere borçnamalaýyn pile ýetişdirmek işlerine girişmek tabşyryldy. Ýurduň dürli künjegindäki sebit häkimiýetleri pile öndürijilere geljek hepdelerde ýüpek gurçuklarynyň paýlanyp başlanjakdygyny aýdyp, degişli iýmitlendiriş otaglaryny taýýarlamagy buýurdy.

ABŞ-nyň Döwlet sekretary Marko Rubio 27-nji martda irden Fransiýa bardy we Eýran, Ukraina hem global howpsuzlyk meselelerindäki dartgynlylygyň kölegesinde geçen ýokary derejeli duşuşygyň ikinji gününe ýygnanan "Uly-7" (G7) toparynyň daşary işler ministrlerine we ýaran wekillerine goşuldy.

Şu günki programmamyzda:

Türkmenistanyň mekdeplerinde bahar dynç alyşy dowam edýär. Okuwdan dynç alýan çagalaryň ençemesi şu günler gazanç etmäge synanyşýarlar. Awtoulag ýuwýan, bazarlarda ýük daşaýan we dilegçilik edýän çagalaryň sany göz-görtele artdy diýip, Azatlygyň ýurt içindäki habarçylary we çeşmeleri maglumat berdi.

Türkmenistan syýahatçylyk pudagyny ösdürmegiň täze tapgyryna gadam basýar diýip, türkmen metbugaty ýene bir gezek ýurduň syýahatçylar, şol sanda soňky 30 ýylda daşary ýurtlara göçen türkmenistanlylar üçin bolmanda ýylda birki hepdelik açylmak ähtimallygyny yşarat edýär.

Waşington bilen Tähranyň arasyndaky göni däl gepleşikler babatyndaky nämälimligiň artýan mahaly, Eýrana, Ysraýyla we töwerekdäki ýurtlara garşy howa zarbalary dowam edýär. Ysraýyl goşunynyň bir wekiliniň 25-nji martda aýdyşy ýaly, bu “adaty iş tertibi” bolup galýar.

Şu günki programmamyzda:

Türkmenistanda çuňlaşýan ykdysady çökgünligiň fonunda çäre, baýramçylyk ‘mejburlygynyň’ barha güýçlendirilýändigi, häkimiýetleriň bu ýagdaýy halkyň ünsüni öz ýagdaýyndan sowmak, ýurtda emele gelen durmuş şertlerinden nägile bolýan adamlary psihologiki basyş astynda saklamak üçin ulanýandyklary habar berilýär.

Türkmenistanda ilatyň ýurduň daşyna çykmaga islegi ýokary bolmagynda galýar. Daşary ýurtlaryň ilçihanalarynyň öňünde uly nobatlar saklanýar. Şu günler Özbegistana gitmek üçin wiza nobatlarynda duranlaryň sany ýüz adama ýetýär. Özbegistanyň resmi maglumatyna görä, diňe şu ýylyň iki aýynda ýurda 50 müňden gowrak türkmenistanly barypdyr.

ABŞ-nyň prezidenti Donald Tramp soňky iki günüň dowamynda Tähran bilen gapma-garşylygy bes etmek barada "örän gowy we netijeli" gepleşikleri geçirenden soň, Eýranyň energiýa infrastrukturasyna hüjümleri bäş günläp togtadandygyny aýtdy.

Şu günki programmamyzda:

- Türkmenistanda 20-nji martda bellenilýän Oraza baýramynda paýtagtyň metjitlerinde baýram namazy okaldy. Metjitleriň käbirine müňlerçe adam bardy. Aşgabadyň häkimiýetleri baýrama birnäçe gün galanda paýtagtdaky we onuň etegindäki metjitlerde, köçelerde we köpçülik ýerlerinde howpsuzlyk çärelerini güýçlendirdi.

- Lebap welaýatyndaky habarçymyz okuwçylardan Nowruz baýramyna bagyşlanan çäreler üçin mejbury ýagdaýda pul serişdeleriniň ýygnalýandygyny habar berýär. Synçylar Türkmenistanda ilatdan syýasy-ykdysady, medeni çäreler üçin serişde ýygnamagyň, maşgala býujetlerine goşmaça agram salmagyň täzelik däldigini, ýöne soňky bir ýylda, durmuşyň has kynlaşmagy bilen, bu çykdajylaryň adamlara barha kän ‘dil açdyrýandygyny’ belleýärler.

- ABŞ-nyň birnäçe habar serişdeleri çeşmelerine salgylanyp, prezident Donald Trampyň Ýakyn Gündogardaky operasiýalary güýçlendirmek üçin goşmaça müňlerçe amerikan guryýer goşunyny ibermegiň mümkinçiligini göz öňünde tutýandygyny habar berdi.

Şu günki programmamyzda:

Paýtagt Aşgabadyň we Arkadag şäheriniň häkimiýetleri welaýatlardan gelip işleýän içerki migrantlary öz ýaşaýan sebitlerine ibermek çärelerini güýçlendirdiler. Häkimiýetler bu çäreleri Oraza we Nowruz baýramlarynyň bellenilýän günlerinde “şäherleriň asudalygyny goramak tagallalary” bilen düşündirýärler. Bu ýagdaýlar barada Azatlyk Radiosynyň habarçysy 19-njy martda sebitden maglumat berdi.

Ysraýyl 18-nji mart güni giçlik Eýrana edýän hüjümleriniň gerimini giňeldip, ýurduň demirgazygyna howa zarbalaryny urandygyny aýtdy. Ysraýyl metbugaty bolsa Eýranyň Hazar deňziniň kenaryndaky deňiz gämileriniň urulýandygyny habar berdi.

Şu günki programmamyzda:

Türkmen metbugaty döwlet baştutanynyň Türkmenistanda “ählihalk bag ekmek dabarasyny geçirmek” baradaky karara gol çekmeginiň il arasynda giň goldaw tapýandygyny habar berýär. Emma synçylar, Azatlygyň çeşmeleri bag ekmek çäresiniň ilat arasynda o diýen gowy görülmeýändigini we soňky ýyllarda, barha çuňlaşýan ykdysady kynçylyklaryň arasynda, “bag ekmegem bir dert boldy, haçan bu teatrdan dynarkak” diýen ýaly gürrüňlere sebäp bolýandygyny aýdýarlar.

Balkan welaýatynyň häkimiýetleri Remezan aýynyň soňky günlerinde sakgal goýberýän raýatlara we hijab dakynýan aýal-gyzlara garşy basyşlaryny güýçlendirdiler. Bu raýatlar saklanyp, soraga çekilýär we sakgalyny syrmaga, hijabyny çykarmaga mejbur edilýär.

Şu günki programmamyzda:

Lebap welaýatynyň Türkmenabat şäherindäki harby bölümde çagyryş boýunça hökmany harby gulluk borjuny ýerine ýetiren balkanly esgeriň tarpa-taýyn aradan çykmagy bilen bagly derňew geçirilip başlandy.

Lebap sebitindäki çeşmäniň 16-martda iberen maglumatyna görä, welaýatyň býujet edaralaryna paýtagtdan iş orunlaryny kemeltmek we ilkinji nobatda milli azlyklaryň, şol sanda etniki özbekleriň, täjikleriň, tatarlaryň wekillerini, şeýle-de pasportynda türkmen diýlip ýazylan, asly özbek bolan işgärleri işden boşatmak barada gizlin görkezme gelipdir.

Birleşen Ştatlar Ormuz bogazy arkaly geçýän gämileri goramak üçin koalisiýa döredilýändigini yglan etmäge ýakynlady diýip, The Wall Street Journal we Axios neşirleri habar berdi. Şol bir wagtyň özünde Eýran boýun egmäge taýýar däldigini aýdýar.